Mas dakong piyesta sa pangalagad

Gullas Medical Center, Banilad — Katam-is sa pahiyom sa tanang gikasugat nako dinhi. Nagbaha ang kamapasalamaton sa tanang nakapamiyesta sa libreng mga pangalagad nga gitanyag sa Jose R. Gullas Halad Foundation. Lunsay sab ang kalipay sa mga nakatampo sa pagpahigayon ug paghimong malampuson sa ikaupat nga sunudsunod nga tuig sa Halad Pasalamat.

Labing malipayon ug mapasalamaton sa tanan si Sir Dodong Gullas. Kinsa nipasalig nga samtang makahimo pa padayunon niya ang pagtanyag sa Sabado nga kinadul-an sa sumad sa iyang adlaw’ng natawhan pag-alagad sa labing kabos ug labing nagkinahanglan nga mga Sugbuanon. Matag tuig magkalapad ang piyesta sa mga pangalagad nga iyang gitanyag.

* * *

Dungan sa Halad Pasalamat gipahigayon sab dinhi ang libreng confirmation nga giduma ni Msgr. Esteban Binghay. Naa na sa iyang ikaduhang tuig, ang libreng confirmation pasiunang gitanyag ni Sir Dodong alang sa mga tinun-an ug mga magtutudlo ug mga kawani sa University of the Visayas ug mahimong palapdan alang sa publiko sa mosunod nga katuigan.

Laing gipuno ni Sir Dodong sa piyesta sa pangalagad mao ang mass wedding karong Huwebes, Enero 30. Otsenta unta ka paresan, pahaom sa ika-80 nga sumad sa adlaw’ng natawhan ni Sir Dodong karong Pebrero 1, apan 60 ra ka magtiayon ang nakahingpit sa mga panginahanglan ug makasal sa Cebu Metropolitan Cathedral sa alas-4 sa hapon.

* * *

Apil sa gipunsisokan pag-ayo dinhi mao ang libreng limpiyo, pasta ug ibot sa ngipon, libreng konsultasyon ug mga tambal, libreng ayo sa cellphones, laptops ug personal computers, libreng tupi, masahe ug reflex, libreng purga ug bakuna sa mga iro ug iring ug ang mass feeding sa The Freeman Foundation ug gift-giving sa Bantay Bata 163 Cebu.

Bantang sa’ng one-stop shop sa mga pangalagad sa National Statistics Office, Pag-Ibig Fund, Philippine Health Insurance ug Land Transportation Office. Labing gidugok ang booth sa National Bureau of Investigation nga nanghinaot nga ang bag-o lang gilusad nga online registration makaiban sa kaliboan ka aplikante nga maghuot sa ilang mga buhatan matag adlaw.

* * *

Daghang salamat ni Sir Dodong sa pagdasig namo sa pagpalambo pa sa umaabot nga mga Grand Halad sa Kapamilya sa ABS-CBN Cebu sa Hunyo ug Nobiyembre karong tuiga. Hinaot nga padayong magtakdanay ug molipang ang matinabangon nga mga institusyon aron maibanan kun di man hingpit nga matagbaw ang morang way kinutoban nga mga panginahanglan sa kinabag-an sa katawhan.  Hinaot nga ang pagpakabana ni Sir Dodong ug ubang kahugpongan sa pribadong sektor makapapugwat inay makapasamot sa pangiyugpos sa nagkalainlaing mga buhatan sa gobiyerno pagtuman sa hagbay ra nga napasagdan nilang mga tahas sa paghatag sa batakan nga mga panginahanglan sa katawhan sa pagkaon, kahimsog ug edukasyon.

* * *

Email: [email protected].