Ug niiway ang dag-om

Mandaue City -- Samtang nagbiyahe mi paingon dinhi, nagsige ko og dayeg sa kanindot sa kahimtang sa panahon. Niuyon ang akong kaubanan nga mas maayo ang panahon bisan niabot na ang bagyong Agaton kay sa nangaging fluvial processions nga giuwan bisan way bagyo. Apan usa sa among kauban nagsige og sal-ot nga hinaot magpadayon ang maayong panahon.

Pag-abot na namo dinhi, nakasabot ko sa iyang panagana. May pat-ak pat-ak diay nga habuhabo nga wa namo mabantayi sud sa sakyanan. Kusog sab ang huros sa hangin. Paghangad nako diha pa kong kabantay nga samtang nipis ang panganod sa ibabaw sa pantalan labihang bagaa sa dag-om sa habagatang bahin sa Metro Cebu.

* * *

Dungan sa pagkabati nako sa live coverage sa DYAB nga hapit na muabot dinhi ang prosesyon sa mga imahen nilang Sr. Sto. Niño ug sa Birhen sa Guadalupe gikan sa St. Joseph Parish, ningiob ang tibuok palibot, nikusog ang huros sa hangin ug nikusog ang habuhabo.

Sukwahi sa tugon sa kaparian sa Basilica del Sto. Niño ug sa ubang mga tagduma sa Piyesta Senyor wa ko magda og pandong ni kapote. Pipila sa mga nagpunsisok dinhi nagsugod na og pagawas sa ilang mga payong, labi na ang mga nagkugos og gagmay’ng bata. Nangamig nga katugnaw nakapahinumdom nga nakalimtan sang akong jacket.

* * *

Ang kabalaka sa hinungaw sa bagyong Agaton nga di ganahang moirog sa Surigao kasamtangan hinuon nga nakalimtan dihang nangabot nang mga imahen. Bisan disiplinado ang mga nagpaabot dinhi giiway gihapon sila sa mga kadete ug mga polis nga nag-ubay sa prosesyon.

Gipakanaog ang mga imahen gikan sa mga karosa. Gibalhin pagpatong sa mga lipak sa kahoy nga gipas-an sa mga abaga sa kalalakin-an. Hapsay nga gihatod sa tampi sa pantalan ug gidawat sa mga tripulante sa nagpaabot nga galleon bisan kun naubos kaayo, nga ang dung naglugos gani pagtupong sa pantalan, tungod sa dakong hunas sa dagat.

* * *

Natinuod hinuon ang pasalig ni Pagasa Visayas Director Oscar Tabada: Ang dakong hunas makatabang pagpagamay sa bawod, sama nga ang katago sa Mactan Channel makasalimbong sa prosesyon gikan sa labing kusog nga huros sa hangin hinungaw ni Agaton.

Dihang niliwag nang galleon gikan dinhi nabantang sa tanan ang talagsaong talan-awon: Niiway ang dag-om, natukas ang kangiob, nihayag ang palibot, nihunong ang habuhabo, nipuyo ang dagat ug nagsugod ang mabulukon nga fluvial procession nga nihatod sa mga imahen, human sa tibuok adlaw ug tibuok gabii nga pagduaw sa Mandaue, balik sa ilang mga pinuy-anan sa Dakbayan sa Sugbo. Nga bisan matag tuig nang gipahigayon nagpabilin nga gamhanang batobalani sa mga kaway ug pangilaba sa kaliboan samtang nilatas ang prosesyon sa kadagatan sa tanang katalagman ug mga pagsuway.

* * *

Email: [email protected].