Kampyon, apan...

Balita gikan sa Indonesia mipahibaw nga usa ka Pinoy nga lumad sa Bisayas (wala ibutang sa balita kun diin sa Bisayas) ang nidaug sa usa ka beer drinking contest didto sa Sulawesi.

Ang premyo dako kunong cash (wa sad ibutang sa balita) ug “one night stand” uban sa usa ka maanyag nga Indonesian actress.

* * *

Ang maong Pinoy nga kampyon sa imnanay (ngalan gipugngan sa mantalaan nga maoy atong tinubdan) andam na modawat sa iyang ganti. Nagsul-ob og loafer nga giimport kuno sa Hong Kong ang kampyon.

Kinoberan pa sa mga broadcast outfits. Sa dihang gi-announce na ang ngalan sa mananaug ug kini mibarog aron modawat sa iyang premyo, gidakop sa duha ka polis.

* * *

Ang iyang sa’a mao ang drinking alcoholic beverage in a public show.

Sa pagsuwat sa balita nga atong gikutlo wa pa kabuhii ang atong drinking champ. Naghinamhinam na tingali sa iyang premyo nga maanyag nga Indonesian actress.

Mao ning giingon nga gibuwenas apan demalas.

* * *

Praise the Lord nga nakarekober na sa iyang stroke si Cebu Archbishop Emeritus Ricardo Cardinal Vidal.

Idol gyud nato na si Cardinal Vidal kay mao nang Sugbuanong tunay. Gipili gyud niya ang pagka Sugbuanon. Cebuano by choice siya. Samtang kita nahimong Sugbuanon  kay natawo man tang Sugbuanon nang daan.

* * *

TRIVIA. Daghan salamat sa mga trisikad ug motorcycle driver kinsa nagpadayon ang suporta sa Banat News.