Makalibog si Purisima

Sugod ning semanaha bag-o na ang mga nawong  sa mga department chief nga imong makita sa mga opisina sa Bureau of Customs sa Port of Cebu. Segun sa kamandoan ni Finance Secretary Purisima ang mga chief balik sila sa ilang mga mother unit. Ambot unsay rason sa maayong sekretaryo nga iya mang gipangbalhin ang iyang mga tawo.

Kay wala ako masayod sa tinuod niyang rason igo lang ko sa pagpangagpas nga para seguro sa maayong collection ang iyang tumong o aron ba kaha mamahimong epektibo ang trabaho sa iyang mga tawo. Pero kun kini ang iyang tumong mura’g misukwahi siya tungod kay segun sa akong nahibaw-an epektibo ang iyang mga tawo sa Port of Cebu gani sa tanang mga Port sa tibook nasud mao lamang kini ang wala maalkansi sa ilang collection. Gani karon lang anaa na sa kapin usa ka bulan ang surplus collection sa Bureau of Customs sa Port of Cebu.

Giingon nga ang maayong pagdumala anaa sa pagpahimutang sa mga tawo diin sila epektibo. Pero lahi ang gihimo ni Finance Secretary Allan Purisima kini tungod kay iyang gipangbalhin ang mga tawo nga epektibo sa ilang trabaho.

Hinuon puwede usab natong maingon nga gibalhin  niya ang iyang mga tawo ngadto sa mga port nga kanunay nga alkanse sa ilang koleksyon aron kini ang makasulbad sa suliran sa lugi nga koleksyon.

* * *

Kun sa balita lang ko nakakita sa mga tawo nga nagsige lang og ubog sa baha, karon nakasinati na gyod ko mismo sa pag-ubog sa mga tagatuhod nga pagbaha kay dia ko ron diri sa Manila eh. Naunsa ba ning dapita diri nga wala may hunong ang ulan maong sige lang upod ang baha. Sukad ko maabot diri sa kaulohan kaniadtong Sabado sa gabii gisugat na ko og kusog kaayong uwan. Hangtod karon Lunes na lang  nagsige lang gihapon ang uwan.

Kun dili pa tungod sa akong tiyan nga nagsige na og panguhit sa kagutom dili gyod ko mokanaug sa akong gipuy-an. Ug dili pa usab tungod ning akong lindog karon dili gyod unta upod ko moubog ning tagatuhod nga baha. Unya gawas nga baha natagbaw pa ko og pangita asa ang Star Bucks kay walay wi-fi sa akong gipuy-an. Maong bisan baha nagsuroy-suroy tawon ko sa dapit nga dili nako kabisado.

Salamat kay ako ra gayong nakit-an ang akong gipangita pero porbida, mahal na ang kape dili pa gyod libre ang ilang wi-fi maong basaha gyod tawon ni ninyong akong lindog kay mahal ra ba ang akong nabayran ani para lang gyod mo makabasa sa akong mga panahom ug opinyon.

Dinhi na lang ko kutob kay basin dili na nako ma-send ning akong lindog kay hapit na ko mag usa ka oras. Makabayad na upod unya ko og usab.