Ang TAMA

Pipila ka adlaw sa dili pa hingpit mag usa ka tuig mopahigayon sa ilang induction of officers ug first General Assembly ang mga sakop sa Tabang Alang sa Maayong Alagad (TAMA) sa Barangay Quiot, dakbayan sa Sugbo karong alas 4:00 sa hapon sa Quiot proper basketball court. Imbitado sa maong okasyon si Mayor Mike Rama nga maoy mopapanumpa sa mga opisyal ingon man sila si Bise Mayor Edgardo Labella ug pipila ka mga konsehal sa dakbayan sa Sugbo ug mga opisyal sa Barangay Quiot. Busa maingon ta nga usa ka dakong kalihokan ang matigayon sa nahisgotang barangay karong hapon. Ang problema lang kay nakadawat ko og taho nga ang mayor tua pa sa Japan ug sa pag uli niini motambong kini og kasal nga naatol usab sa samang oras sa kalihokan sa TAMA. Pero anaa na sa mayor kun asa siya, adto ba siya sa kasal o adto ba siya sa mga tawo nga milihok para kaniya sa miaging piniliay.

 Ang kagul-anan ug mga pagbangotan sa mga tawo nga gibiyaan sa ilang mahal sa kinabuhi ingon man ang mga kasakit sa kinabuhi mao ang nakapahimugso sa usa ka kapunongan nga gitawag og TAMA o Tabang Alang sa Maayong Alagad sa Barangay Quiot.

Sa pagka karon ang TAMA organization aduna na kini 1,300 ka mga sakop nga pamilya nga naghiusa aron magtinabangay panahon sa kalipay, kalisdanan ug mga kagul-anan. Gisugdan lang kini sa Barangay Quiot apan gipaabot kini nga mokatap sa tanang barangay sa dakbayan sa Sugbo ug labing seguro sa lalawigan.

Ang TAMA dili usa ka politikanhong kahugpongan ug wala kini kolor sa politika. Dili kini yellow green o yellow blue pero motabang niadtong mga tawo nga mitukma ang prinsipyo sa prinsipyo nga iyang gibarogan. Ang TAMA sukad sa iyang pagkahimugso padayon kining nagbarog sa mga prinsipyo nga iyang gituohan nga maayo o tama para sa iyang mga sakop o membro.

Sa mga unang opisyales ug mga sakop sa Tabang Alang sa Maayong Alagad organization Congratulations ug padayon sa paglakaw sa dalan sa kaayohan para sa tanan.

* * *

Ako diay nga pasalamatan ang mga maayong alagad nga mitampo para sa kalamposan sa ipahigayon namong kalihokan karong hapon. Akong pasalamatan sila si Sir Oscar Chua sa SIMONS ENTERPRISES ug Israel Alin sa ALIN CUSTOMS BROKERAGE, Engr. Edwin Rosalina ug sa tanang mga mihatag sa maski unsang ayuda, kaninyong tanan, DAGHANG SALAMAT.