Bag-o nakong hinigugma

Human gipahibawo sa Google ang bag-o nilang Nexus nga telepono nga hinimo sa Samsung sayo karong tuiga nitumaw ang daghang huhungihong nga mogawas na sa di madugay ang Nexus 5 nga magda na sa labing bag-ong operating system sa Android, ang Key Lime Pie. Mahinamon kong nag-atang sa bag-ong mga produkto nga gipagawas sa Google sa niaging semana. Way Nexus 5. Way Key Lime Pie. Mas nipis nga Nexus 7 nga tablet ang ilang gipasundayag. Ug igo lang gibag-o ang ilang karaang operating system, Jelly Bean, ngadto sa 4.3. Nakaginhawa ko og luag. Wa pa diay mabiya ang daan nakong telepono.

* * *

Napalit nakong Nexus 4 dayong tapos sa niaging tuig. Nagsugod na og ungot ang mas karaan nakong Galaxy S nga gipugos nako og update ngadto sa Jelly Bean. Nadani sab ko sa pasalig sa Google nga ang Nexus direktang makadawat sa ilang updates nga di masangit sa manufacturers, sama sa Samsung nga maoy naghimo sa labing bag-ong Nexus karong tuiga ug LG nga maoy naghimo sa Nexus 4 sa niaging tuig. Apan ang labing dakong rason, nakatag-an ka, mao ang kaubos sa presyo. Gawas nga maoy kinabaratohan sa tanang smart phones nga pulido ang sangkap ang Nexus 4 gihulagway pa gyud nga teleponong gihimo alang sa umaabot.

* * *

Kun naglibog na ka pagsubay sa mga numero nga nahisgutan sa ibabaw, wa ka mag-inusara. Apan ang mga numero di maoy importante. Ang di malalis nga kamatuoran mao nga nailog na sa Android ang liderato sa smart phones sa Estados Unidos ug sa tibuok kalibotan. Gawas nga mao nay nagpalihok sa labing daghang mobile phones gisigehan na sab og kopya sa Apple sa umaabot nilang modelo sa iPhone. Ug Nexus maoy mohatag nimo og lunlon Android nga kasinatian. Di makapanghilabot ang Samsung ug ubang manufacturers. Maong mahinamon na kong nagpaabot sa Android 4.3 nga mohimo sa akong telepono nga mas abtik ug mas daghan og mahimo.

* * *

Duha ray posibleng katin-awan nganong wa pay bag-ong Nexus nga telepono: Naglisod ang mga enhinyero sa Google paglabaw sa ila nang nahimo; o abante lang gyud kaayong pagkahimo ang Nexus 4 nga makasugakod pa sa pakigsakbang sa mas bag-o ug mas mahalon nga smart phones. Si anhing Steve Jobs nimando sa mga enhinyero sa Apple sa paghimo og telepono nga di lang mapuslanon kun dili higugmaon gyud sa konsumidor. Natuman nilang sugo sa nangaging mga henerasyon sa iPhone. Hangtod nga nahinog ang Android ug nagmalampuson ang Google pagpakatap sa labing bag-ong applications sa mga telepono nga di Nexus.

Ang Nexus 4 sakto ra sa akong bulsa, way hapin ni sudlanan, way gapos sa manufacturers ug nakaangkon na sa akong gugma.

* * *

Email: [email protected]