May pa wagtangon ang SK

Sa nagsingabot nga piniliay sa barangay mitumaw ang sugyot sa usa ka Commissioner sa Commission on Election nga wagtangon na lang ang Sangguniang Kabataan aron ang piniliay sa mga opisyal sa barangay na lamang ang ilang atimanon.

Ang sugyot nga pagwagtang sa Sangguniang Kabataan nagasukad gihapon sa una nang mga rason nga ato nang nahibaw-an nga sa kinatibok-an kun atong sumadahon wala magbunga og maayo ngadto sa gituohan natong mga mamaayong lider sa nasud.

Ang sugyot nga pagwagtang sa Sangguniang Kabataan nakapahaling og lantugi sa mga miuyon ug wala mouyon niini. Pero kun ako, mas maayong wagtangon na lang ang Sangguniang Kabataan tungod kay ako’y nakuyawan nga sa pag-abot sa umaabot pang katuigan wala na unya kitay mapili ug wala na unyay magpabiling tarong sa ilang pagpangatungdanan ug pagpangalagad sa katawhan tungod kay sa linghod pa lang nilang salabotan gitudloan ug nakat-onan na nila ang kahugaw ug ang pagpangawkaw sa sayo nilang pagpangalagad.

Subo kaayong palandungon nga ang mga ginikanan sa mga nagpapiling opisyal sa Sangguniang Kabataan (seguro dili tanan pero nakahibawo ko nga sila daghan) ina kay maoy mogiya sa ilang mga anak aron mamahimong ikapasigarbong lider sa nasud mao na man hinoon ang mitudlo sa paghimo sa ilang mga anak nga badlungon sa ila unya nga pagpangalagad. Kini tungod kay ang linghod nga pangidaron sa ilang mga anak ilang gitudloan nga mamahimong kurakot sa pagpangalagad. Wala taronga ning maong mga ginikanan ang ilang papel sa paggiya sa ilang mga anak nga mamahimong sumbanan sa iyang henerasyon ug katilingban kay maoy gipatigbabaw ang kahakog sa gahom.

Busa kun ako lang, samtang aduna pay mga ginikanan nga hakog og katungdanan ug nabota sa gahom sa politika mas maayong wagtangon lamang una ang piniliay sa Sangguniang Kabataan kay gawas nga dili na ta mabalaka sa atong ugma makadaginot pa ang atong gobyerno.