Sipsip di katakos parang Rama

Abellana National School, Cebu City — Mahimo mao na ni ang kataposang job fair nga dumalahon ni Fidel Magno, ang pangu sa Department of Manpower Development and Placement (DMDP), dinhi. Kun tuohan ang mga huhungihong nga ang mga batabata ni Mayor Mike Rama naglumpayat na pagpuli niya. Si Magno usa sa department heads nga giawhag ni Rama sa pag-resign. Aron mahimo siyang mas gawasnon sa paglahugay sa mga departamento sa City Hall. Nga ang bugtong tumong, pinasikad sa mga hudlat ug mga pamahayag nga iyang giluwatan sa niaging mga adlaw, mao ang pagtangtang sa tanang gidudahan nga mga dumadapig ni Kongresista Tommy Osmeña aron mapulihan sa mga dumadapig nga lunod-patay ni Rama.

* * *

Suod kaayo silang Rama ug Magno. Sila’y gitahasan ni Osmeña sa pagsugod sa job fairs sa Sugbo. Nga karon gisunod na sa hapit tanang local government units sa Pilipinas. Si Rama maoy labing nahibawo sa talagsaong gugma ug katakos ni Magno sa trabaho. Apan may mga naglibot ni Rama nga hagbay rang naibog sa katungdanan ni Magno. Di tungod sa kadaghan sa mga gimbuhaton sa DMDP pagtudlo og katakos ngadto sa mga tinun-an ug mga aplikante ug paghimo nga mas sayon sa ilang pagpangaplay og trabaho sa sud ug sa gawas sa nasud. Kun dili tungod sa kadaghan sa kahigayonan sa pagpanguwarta.

* * *

Hangtod karon wa pa makigsulti si Rama ni Magno ug sa ubang department heads nga nagdumili pagduko sa iyang awhag niadtong Abril nga mutabang sa iyang politikanhong kampanya. Nanggawas silang Magno ug kaubanan sa tigom ni Rama kay nagtuo nga kalapasan sa balaod ang paggamit nila alang sa pamolitika. Bugtong nadunggan nilang Magno ug kaubanan mao ang mga pamahayag ni Rama sa media nga nagdasig nila sa pag-resign. Nitataw si Magno nga di siya mo-resign: Batan-on pa siya aron mo-retire; daghan uyamot ang nahimo sa DMDP; ug wa siya mahilambigit sa bisan unsang anomaliya.

* * *

Kay di man kataktak si Rama niya, nangandam nang daan si Magno nga ilabay siya og laing departamento. Nga bisan unsa pa nakaseguro si Magno mahimong mas gaan ug mas sayon ang iyang trabaho. Gihangop niya ang kahigayonan nga makapahuway na gikan sa way kinutoban nga pagtukaw sa sinemana nga job fair ug inadlaw nga mga proyekto sa DMDP. Nanghinaot si Magno nga di hunungon ni Rama ang job fairs ug ubang mapuslanon nilang mga programa. O nga mas takos pa ang mopuli niya aron nga mas daghan pang katudloan og katakos ug mahatagan og trabaho. Nasubo lang si Magno nga ang bugtong lagda ni Rama pagpangandam sa iyang ikaduhang termino mao nga libotan siya sa iyang mga dumadapig. Bahala nang kalidad sa pangalagad ngadto sa Sugbuanon nga mga magbubuhis.

* * *

Email: [email protected]