CHAMP follow up

Gitug-anan ko ni Philipp Zafra, chief of staff sa Office of the Mayor sa dakbayan sa Sugbo, nga ila na nga tumanon ang sugyot sa Commission on Audit (COA) nga ang City Hall na ang mopalit og mga tambal para sa CHAMP unya anha ibutang sa botika sa Cebu City Medical Center.

Giangkon ni Zafra ug ni City Administrator Jose Marie Poblete nga duna g’yuy angay’ng himoan og kausaban sa pagpatuman sa CHAMP, ilabi na ang batasan sa mga kawani nga gitugyanan sa maong programa.

Angay unta nga ang kawani sa City Hall nga gidistino sa Botika sa Masa diha sa B. Rodriguez nga maoy usa sa tulo ka botika nga gikontrata sa dakbayan paghatag sa mga tambal sa beneficiaries sa CHAMP dili magmugtok ug dili bug-at og tingog ngadto sa mga modangop kanila.

Pastilan, basin og nagtoo tingali ka nga empleyado ka sa City Hall, basin kaswal ka pa, hawod ka na kaayo. Palihug Mr. Henry Sanchez, ikaw may gitugyanan sa mayor sa pagpatuman sa CHAMP, unsa wala kay kasayuran niini? Nahibalo man gani si Atty. Poblete.

Kun ang City Hall maoy direkta nga mopalit sa mga tambal gikan sa mga manufacturers tingali barato pa ang presyo ug kun anha kini ibutang sa CCMC pharmacy, mahimong ang CCMC mao pa ang makaganansya.

Pananglit anha na sa CCMC ibutang ang mga tambal duol pa kaayo alang sa mga CHAMP beneficiaries kay ang opisina sa CHAMP anaa man sa silong sa CCMC.

Unya ang pagpanghatag sa mga tambal kinahanglang dili tingubon sama sa gihimo sa Botika sa Masa nga ihatag lang ang tambal gikan sa alas dos ngadto sa alas singko sa hapon.

Kun gamitonon ang tambal sa buntag, pahuwaton pa g’yud ninyo sa hapon? Unya kun moinsistir ang CHAMP beneficiaries inyong kasab-an? Inyong mugtok-mugtokan sa nawong?

Awhag nako sa mga opisyal sa dakbayan nga susiha ra gud ninyo personal kining mga botika nga gikontrata ninyo nga mohatag sa mga tambal sa CHAMP aron kamo makahibalo.

Akong gisusi, bisan si Zafra ug Poblete wala man makakita niining maong mga botika nga maguwang lang sa sari-sari store. “In-fairness” sa Pro-Inay Pharmacy wala ko’y problema kay maayo moabi-abi, apan dili lang kompleto sa mga tambal.

Nagreklamo usab kuno ang mga tagdumala sa botika nga dugay sila nga mabayran sa City Hall. Aw sulbara ninyo nganong dugay nga mabayaran kay basin dili kompleto ang inyong mga papeles.

Kun kompleto ang papeles unya ang City Hall ang gadugay-dugay, hala duola ko kay atong ipadangat sa mayor nganong gidugay-dugay ang bayad.