Ang political endorsement

Tungod kay duol na gyod ang piniliay nanggawas na ang nagkalain-laing gimik sa mga kandidato. Usa na niini ang pag- endorsar kuno kanila sa mga grupo o personalidad nga katoohan pa sa mga tawo.

Kaniadtong miaging semana nadapit ang akong pagtagad sa napatik sa pamantalaan dinhi sa Sugbo diin adunay mga leader sa mga nagkalain-laing kahugpongan ang mipadayag gayod sa ilang pagsuporta kang Bebot Abellanosa.

Usa sa mga mipirma sa pagpasalamat ug pagsuporta kang Bebot Abellanosa mao si Rudy Romares nagpailang presidente sa ERPAT FEDERATION for men. Sa ako nang giingon nadapit ang akong pagtagad sa pasalamat ni Bebot tungod sa pangalan ni Rudy Romares ug ERPAT Federation tungod kay karon pa ako makahibawo nga aduna diay Federation ang mga sakop sa ERPAT.

Ako man ugod ang presidente sa ERPAT sa Barangay Quiot ning dakbayan sa Sugbo ug sa akong pagka presidente wala man gyod ko makadawat og imbitasyon alang sa usa ka tigum nga pagahimoon alang sa pagpili og mga opisyal sa ERPAT Federation. Busa kun may election man ugaling sa Federation, kinsa  man ang didto? Pila ra man kaha sila ka book ang nanambong.

Wala nako kwestiyona ang pagka presidente ni Rudy Romares sa ERPAT Federation. Gusto lang ko nga mahatagan og katin-awan sa gitawag og ERPAT Federation. Gawas niini, kay nagpasalamat siya ni Bebot Abellanosa ug ang tenor sa iyang pagpasalamat sama na sa nag-endorsar sa kandidatora ni Abellanosa, ang pag-endorsar niya sa kandidatora ni Bebot Abellanosa personal ba lang niya kini o gidala niya ang kinatibuk-ang ERPAT Federation.

Kun ang iyang pag-endorsar personal, nganong giapil man niya sa pagdala ang iyang pagka presidente sa ERPAT Federation sa iyang pagpasalamat ni Bebot Abellanosa? Kun ang endorsement dili personal kun dili iya sa Federasyon, aprobado ba kini sa tanang sakop sa federasyon, nananghid ba siya niini sa kabag-ang sakop? 

Mas maayo segurong hatagan nimo/ninyo og katin-awan ang mga opisyal ug sakop sa ERPAT sa Barangay Quiot ning dakbayan.