EDITORYAL - Ang kagawasnon ni Bella Ruby Santos

Daghan bayang  nagduda  nga  kining  temporaryong  kagawasan  ni  Bella Ruby Santos  mosangpot  ngadto  sa iyang  hingpit  nga pagwagtang

Aw  hinuon  kining  pagduda  di man kalikayan  tungod  sa background  ni Bella  Ruby  niadtong  pagpausab  sa iyang  dagway  nga  kun di pa abtik  ug  igmat  ang  usa  ka  sakop  sa NBI, di  gyud  siya  makatilaw  og  priso.

Ang kaabtik  ni  Bella  Ruby   bisan  babaye  siya  mura’g  wa mahimo  ni  Ruben Ecleo Jr,  ang  giingon  nga  nahanaw  na  sa hingpit  karon  murag  tagulilong.

Ambot  gikapoyan  ba  kaha  ang  mga otoridad  sa pagpunay  og  espiya  kang Ecleo  kay  namingaw  na man ang    maong isyu.

Ang isyu  bahin kang Ecleo  natabonan  sa mga  isyu  nga  politikanhon  diin  ang  konsentrasyon  sa kapolisan  ug  kasundalohan  gipunting  na  ngadto  sa  mga  goons  sa  mga  kandidato.

Busa  kun  nawagtang  si  Ecleo   sa  natad  sa politika  ug  sa  iyang  pagka-wanted  nga  mas  luya  pa siya  kun  itandi  kang  Bella Ruby, hayan  nga  labaw  pang  mapapas  sa hingpit  si  Bella Ruby  gikan  sa  panan-aw  sa katilingban  ug  sa  mga  hingtungdang  mga  kihante  kaniya.

Ang  mga  kihante  ni Ecleo  nahilom  na lang  usab  kay  gisandig  ug  gitugyan  baya  niini  ngadto  sa  mga otoridad  ang  pagbantay  sa ilang  sinumbong.

Apan naunsa  naman  kining  pagkabutanga nga  nahanaw  na man  daw  aso  ang  ilang  higpit  nga  kaaway  nga  miunay  pagpatay  sa kaugalingon  niyang  asawa.

Ingon  usab  niini  ang  panan-aw  sa  mga  tigpaniid  kang  Bella Ruby  nga  dako  kaayo  og  purohan  nga  sa di madugay  hingpit  na  kining  mapapas  sa hunahuna  sa  kadaghanan.

Ang isyu  nga  makapatabon  niini  daghan  kaayo  ilabi  na  karong  political season  pa,  usa niini  mao  ang mga reklamo  ug  kaguliyang  human  sa election.

Problema  sa kakuwang  sa mga bangko  ug  mga  lawak  sa eskuylahan  inig-abli  sa klase, suliran  bahin  sa paghugpa  unya  sa   mga lunop, baha, bagyo  sa panahon  sa ting-uwan.

Mga  isyu  sa panahon  sa pasko,  bag-ong  tuig,  mga  sunog  ug  uban  pa,  nga  inigkalingaw  sa  mga  tawo  niini  lisud  na  hinumdoman  si Bella  Ruby ug Ecleo  hangtud  nga  mahanaw  sila hingpit  daw  aso.

            Luoya  sa  mga  kihante  no.