Leksyon sa sunog

Nagmalampuson ang gipahigayon nga Fire Olympics 2013 nga gi-organisar  sa Bureau of Fire Protection Office of the Provincial Marshal Cebu Province gipangulohan ni SUPT. NEPOMUCENO DANGOY, ang Provincial Fire Marshal.

Dunay lima ka participating teams ang misalmot sa maong indigay sa kahanas ug kaabtik sa pag-rescue og biktima, paglukot ug ladlad sa fire hose ug uban pa.

 Ang mga participating stations mao ang Talisay City Fire Station ubos sa pagdumala sa ilang City Fire Marshal CINSP ANTONIO ORTIZ, Consolacion Fire Station headed by INSP JPSEPHUS ALBURO, Cebu City Fire Station North ug South teams nga gipanguluhan ni CINSP WILLIAM TACALDO ug ang Mandaue City Fire Station uban ilang City Fire Marshal CINSP ROY ORBETA.

Gilangkat sa Cebu City Fire Station South team ang kampiyonato ug gisundan kini sa Cebu City Fire Station North ug nakuha ang ikatulo nga pwesto sa Talisay City Fire Station.

Napuno sa aksyon ang tibook adlaw nga kompetisyon bisan pa sa naglagiting nga adlaw wala kini gipanumbaling sa atong kabomberohan sa ilang paningkamot og perform sa matag event.

Ang tumong sa maong kompetisyon mao ang pag-enhance sa firefighting skills sa atong kabomberohan ug ang pag-bonding sa mga kauban sa buhat. Lakip sa mitambong sa maong olympics ang atong Regional Director SR. SUPT. MA.  LUISA  C.  HADJULA, nga  namahayag nga kinahanglan mangandam gyud kanunay aron makaserbisyo sa katawhan.

Sa pikas bahin, kalooy intawon sa duha ka mga bata nga napaig sa gamay ra unta nga sunog didto sa Barangay Cabadiangan lungsod sa Compostela. Hasta ko nahibulong kay ang usa ka 14 anyos makamao na man unta nga modagan ug makamao nang mosalbar sa iyang kaugalingon ug bisan pa gani ngadto sa iyang manghud nga 2 anyos pa lamang.

 Nahibaw-an na lang namo sa pagdawat na sa spot report nga duna diay kakulian sa panglawas ang maong 14- anyos maong wala intawon makagawas sa nasunog nga panimalay.

Unsay leksyon adtong sunoga? Ayaw intawon biyai ang atong mga anak nga sila ra. Ika-duha, dili gyud kalikayan nga mabiyaan kini, apan ato silang tudloan kun unsa ang buhaton pananglit simbako dunay sunog nga mahitabo duol sa atong lugar o magsugod ba kini mismo sa atong panimalay.

Sa kataposan, napuno ug nagmaya na gyud ang katawhan ug ang kalibotan  tungod sa pagkapili ni Pope Francis nga lumad nga taga Argentina, South America. Hinaut nga sa maong kalamboan ug sa pagkaligdong sa maong bag-ong Papa magiyahan unta ang kapin usa ka bilyon nga mga Romano Katoliko.