EDITORYAL - Ang pagka-knock out ni Pacman

Uban  sa pagkalukapa  ni Manny Pacquiao  ug  pagkatulog  niini  makadiyot  sulod  sa ring  dihang  nasugatan  ang  hunat  nga  kumo  ni  Manuel Marquez, daghan  kaayong naluya.

Wa magdahom  nga  mao  kadto ang  mahitabo  kang  Manny  kinsa naglayag  na  unta  sa kadaugan  dihang  gipakita  niya ang  iyang  orihinal  nga ka-agresibo  sa away.

Daghan  ang  nakamatngon  nga  gumikan  sa iyang  kakompiyansa  nga  mapildi  niya  si Marquez wa  na siya magpanagana  sa pagdasmag ug atake  kang Marquez  hangtud  nga   nasugatan niya  ang  kumo  sa iyang  kaatbang.

Ambot  kun  ngano  nga  sa kaabtik unta  sa iyang  lawas  molihay-lihay  gikan  sa  mga  kumo  sa  iyang  mga kontra  sa daghang  mga  higayon  sa iyang  away sa ring, niadto ra mang  Domingo   nga wa  siya  makaikyas   sa kumo  ni  Marquez  nga  mipusnga  sa iyang suwang.

Hinuon  nasayud ang  tanan  nga  mas arang-arang  pang  maigo  ka  og  kumo  sa apapangig  kay  matumba  ug malukapa  man  ka  apan  di mokirig.

Lahi  sa  suwang  nga  kun  maoy  masabak  makatulog  gyud  ang  tawo sama  sa nahitabo  kang  Manny nga  nahinanok  gyud  siya  og  mga upat  ka minutos  kapin kun  kulang  nga gani  mihilak  na  ang  iyang asawa  sa kabalaka  nga mopahuway  sa dayon  ang  nabantog nga  boksidor  sa tibuok  kalibotan.

Ang  panglantaw  sa uban  mao  nga sa natad  sa boksing, moabot  gyud  sa kinabuhi  sa boksingero  ang  maong  higayon, gawas  kun  miretiro pa  siya  og  sayo  ug di unta  niya  masugatan  ang  nahitabo  niya kagahapon.

Kun nagplano  man  siya nga  mopadayon  sa maong  karera, ambot  kun  may  debuenas  pa ba kaha  nga moabot  sa iyang  kinabuhi  o moretiro siya  nga  magbawon  sa dakong dimalas  sa kinabuhi  sa pamoksing.

Ang  uban  mi-konklusion  dayon  nga  gidimalas na  si Manny  kay mibalhin kuno  kini  og  relihiyon kay  gani  sa dayon niyang  harong   kang  Marquez  wa na man  kuno  kini  manguros.