Nagkinahanglan og milagro

Human sa pipila ka bulan nga grabeng kampanya, nasubli si Barack Obama pagka-presidente sa Estados Unidos sa piniliay sa niaging semana. Hinuon naglisod gayud si Obama sa iyang reelection campaign.

Hapit gayud milampos ang Republican nga si Mitt Romney pagpapha kang Obama gikan sa White House. Dili ikalimod nga maayo ang dagan sa kampanya sa kampo ni Romney diin daghang estado ang misuporta kaniya.

Hinuon pakyas sila pag-capitalize sa kasamtangang krisis sa ekonomiya sa Estados Unidos aron pagpukan kang Obama. Bisan pa man nga kining maong problema maoy nag-unang isyu atol sa presidential campaign.

Klarong nahutdan sa estratehiya ang Republican Party. Kini ang hinungdan mao nga gilupig sila sa mga pabuhagay’ng saad ni Obama. Ug nagpabilin gayud sa puwesto ang Democratic Party.

Sa mga bugnong lugaynon, dako gayud nga misyon ang pagpildi sa incumbent. Bisan dinhi sa Pilipinas, lisod gayud pildihon ang mga kandidato nga anaa sa administrasyon. Kini sa rason nga anaa niini ang tanang resources.

Suwerte si Obama tungod kay mayoridad sa mga Amerikano ang dako pa og pagsalig kaniya. Kini bisan pa man sa nagkalugmok nga ekonomiya sa nag-inusarang superpower sa kalibotan ilalum sa iyang administrasyon.

Hinuon makaingon kitang usa si Obama sa labing demalas nga presidente sa Amerika. Kini sa dihang iyang nasunod ang natiurok nga ekonomiya nga nagsugod na og paglukapa panahon sa administrasyon ni George Bush.

Hangtud karon, wala pa gihapon maka-recover ang Estados Unidos gikan sa krisis pinansiyal nga mibangkaroti na og pipila ka mga kompanya nga miresulta usab sa paghubas sa liboan ka mga trabaho.             

Bisan paman niini, mayoridad sa mga Amerikan ang wala pa gihapon mawad-an sa ilang pagsalig kang Obama. Kini pinaagi sa pagtugyan sa kasamtangang pangulo og laing upat ka tuig nga termino sa White House.

Sa iyang ikaduhang termino, dakong bukid ang sagubangon ni Obama pagpatubo pag-usab sa ekonomiya sa Estados Unidos. Ang hinungdan ngano nga napili siya pag-usab sa puwesto mao ang dakong pagtuo sa katawhan nga siya lamang ang makasulbad niining maong krisis sa ekonomiya.

 Ug klarong nagkinahanglan og milagro si Obama pagsulbad niining maong problema ilalum sa ikaduha niyang termino.