Kainit na’s eleksyon

Ang nahitabo sulod sa Waterfront Police Station sa miaging semana mahitungod sa panag-away sa mga magsisibya nga nagdumala og political programs sa nagkaatbang nga kandidato maoy tilimad-on nga init kaayo ang politika ning panahona.

Unsaon nga “close fight” man gud kaayo sila si Mayor Michael Rama ug Kongresista Tomas R. Osmeña sa ilang pag-ilogay kun kinsa kanila ang modaug sa pagka mayor dinhi sa dakbayan.

Ang mga nagdumala sa ilang programa sa radyo nagkabingkil g’yud. Una, akong nahibaw-an gikan sa akong mga kauban nga gihulga si Nanette Garong, ang program handler sa “Tommy Osmeña ug ang Barangay” sa DYLA.

Nagsunod man gud ang programa nga misuporta sa Team Rama ug ang programa sa BOPK. Alas 11:00 ngadto alas 11:30 sa buntag ang dapig sa Team Rama ug 11:30 ngadto sa alas 12:00 usab ang sa BOPK.

Samtang giinterview sa programa sa Team Rama si Felisicimo “Imok” Rupinta, kandidato pagka konsehal sa Team Rama, nakalitok si Nanette nga si Imok napilde na sa iyang pagdagan pagka konsehal. Aw tinuod man ‘sab.

Giingnan si Nanette sa usa ka kauban ni Imok nga “basa og baba.” Dihang nasuko na si Nanette, ang laing kauban ni Imok mipasidaan kaniya nga magbantay lang inig-gawas niya sa estasyon. 

Gireport ni Nanette sa Waterfront Police Station ang pagpanghulga. Didto sa police station, nahitabo na usab ang lalis ni Nanette ug ni Chet Beltran-Ortiz, ang usa sa mga nagdumala sa programa nga misuporta sa Team Rama.

Mireklamo si Nanette kang Chet kay nagsaba-saba kuno, apan nangatarungan si Chet nga mitubag ra siya sa pangutana sa reporter. Apan nadunggan ni Nanette nga giingnan siya ni Chet nga “desperada.”

Nagkatinubagay na usab sila si Chet ug Nanette. Atubangan sa daghang tawo, giingnan ni Chet si Nanette nga “kawatan.” Kadto maoy lahap na kaayo nga kabahin sa panag-away.

Ang mahitabo niini, gikan sa ordinaryo nga lalis mahimo nga mosangko na kini sa pagpasaka og kaso nga pagpakauwaw kun makahukom si Nanette nga mokiha.

Alang kanako, kun nagdapig ka sa usa ka kandidato ug makadungog ka nga gituis ang isyu diha sa programa sa radyo, makalagut g’yud tinuod.

Isip reporter nga suheto sa mga isyu sa City Hall, makabantay g’yud ko nga dunay mga magsisibya nga gituis ang isyu aron “mohumot” sa publiko ang ilang gilabanan nga kandidato.

Ang maayo unta nga kamong mga binayran nga magsisibya, ayaw ninyo lubaga ang isyu aron lang g’yud nga mopabor kaninyo. Pinaagi niini, ang katawhan makasabut ug sila modayeg        kaninyo.