Ang mag-atbang nga kandidato dili makalibog

Daghan ang nag-ingon nga ang panag-atbang sa duha lamang ka partido dili makalibog alang sa pagpili sa mga tawo kun si kinsa ang ilang paluyohan sa 2013 mid-term election ilabi na gayod kun ang maong mga kandidato nga mag-atbang pulos na nakahupot sa katungdanan nga kasamtangan karon nilang giilogan.

Matud pa nila nga sa 6th District sa lalawigan nga gilangkoban sa Mandaue, Consolacion ug Cordova maoy labing sayon nga pilion ang nagkaatbang nga mga kandidato sa maong lungsod dili gayod makalibog sa pagpili sa mga botante kay gawas nga duha lamang ka partido ang sagad kanila nasulayan na ang ilang pagserbisyo.

Si Mayor Teresa Alegado sa Liberal Party uban sa iyang bise mayor nga si Dr. Aurelio Damole hingpit na nga naka-file sa iyang CoC sa miaging adlaw.

Magpasubli sila sa ilang ikaduhang termino ug atbangan sila ni kanhi mayor Avelino Gungob Sr., ug iyang tandem nga bise mayor si Jugan Barangay Kapitan Diosdada Gielczyk.

Si Mayor Alegado nga maoy incumbent nga mayor sa maong lungsod ug sa iyang pagpasubli sa katungdanan iyang ikaatbang si kanhi mayor Gungob nga kandidato sa One Cebu Party nga nahimo na usab nga kanhi mayor sulod sa tulo ka termino.

Ang iyang mga sakop sa konseho pulos na usab nasulayan sa pagserbisyo sa goberno tungod kay sagad kanila pulos nakasulay sa pagserbisyo sa goberno nga kun dili man gani konsehal, opisyal kanhi sa military o opisyal sa kapolisan.

Naglakip sa iyang line up nga mga konsehal mao sila si kanhi Konsehal Arolfo Aurelio Abenales, incumbent Councilor Iluminado Alin nga retired police official, kanhi vice mayor Ember Alinsug nga retiradong military official, Eusebio Cordova nga usa ka civil engineer, Leo Go nga kanhi mayor sa maong lungsod, incumbent councilor Analee Gungob, Agustin Lloveras nga retired police official ug Leonardo Lagroma.

Sa nagkaatbang nga mga kandidato kinsa man kanila ang nakahatag ug makatagbaw nga serbisyo sa katawhan sa maong lungsod.