Gihatagan sa kagamhanan sa dakbayan sa Mandaue og dakong kantidad nga salapi ang upat ka tigulang nga mga molupyo sa dakbayan sa Mandaue sa pagpahalipay sa taas nilang pangidaron nga maoy nag-ila kanila nga “centenarian beneficiaries” sa maong dakbayan karong tuiga.
Natigayon ang paghatag og dakong kantidad nga salapi ngadto sa upat ka tigulang nga mga lumad nga molupyo sa dakbayan ubos sa ilang Centenary Senior Citizen Award sa dakbayan pinaagi sa giaprobahan nilang resolusyon nga gipangamahanan ni Konsehal Demetrio Cortes Jr.
Ang maong resolusyon maoy nagtugot kang Mayor Jonas Cortes sa pagpagawas og salapi nga nagkantidad og P200,000 nga maoy bahinon nga ganti sa upat ka mga tigulang nga gihatagan og pasidungog sa kagamhanan sa nakab-ot nilang panuigon.
Ang mga molupyo nga nagpanuigon na og 100 ngadto pataas maoy nakadawat og pahalipay nga P50,000 ang matag usa kanila mao sila si Emiliana Cabrera, sa barangay Guizo, Leoncio Lumapas sa Ibabao Estancia, Lourdes Lasap sa Banilad ug Olympia Judilla sa barangay Paknaan nga 106 ang panuigon nga maoy labing tigulang nga molupyo sa dakbayan.
Sa naabot nga panuigon sa upat ka mga molupyo sa dakbayan maoy nagsilbing kamatuoran nga makaayo gayod sa panglawas sa tawo ang kanunay nga pagkaon og utan. Ang mga batid sa panglawas nga dako kaayo og kalainan ang kanunay nga pagkaon sa mga karne sa hayopan sama sa baboy nga maoy mahimong hinungdan sa pagtakboy sa mga sakit sa kalawasan nga bisan batan-on apan naghambin na og balatian nga pagpanakit sa lutahan ug high blood.
Kini ang hinungdan nga kadtong gusto nga makabaton taas nga panuigon sama sa upat ka mga tigulang sa dakbayan nga nakadawat og salapi sa kagamhanan sa maong dakbayan maoy labing maayong himoon “padayonon gyud ang pagkaon sa utan.”-(Romeo T. Limpangog)