Nagkaminyo tungod sa BN

Kaniadto, sa mga duha o tulo ka tuig pa ang Banat News, aduna kini pen-pal section. Daghan ang nagpapatik sa ilang ngalan sa maong section ug daghan sab ang wala magpapatik apan mipada la’g suwat ngadto sa mga ngalan nga napatik na.

* * *

Si Carmen (dili tinuod nga ngalan) maoy usa sa mga magbabasa nga mipadag suwat sa usa ka lalaki kang kansang ngan napatik sa maong pen-pal section. Ang lalaki mao si Richard (dili tinuod niyang ngan).

* * *

Si Carmen lumad nga taga Cebu City samtang si Richard taga Bohol apan anhi nanimuyo sa Cebu gumikan kay anhi dinhi ang iyang trabaho.

* * *

Nagka-higalaay si Carmen ug Richard pinaagi sa suwat. Wala pa man kaniadto ang celfone diin sila unta makatext-text. Pila may sugilanon, misuod ug misuod ang panaghigalaay ni Carmen ug Richard, hangtud nga misangpot kini sa panaghigugmaay.

* * *

Nagkaminyo sila si Carmen ug Richard ug gani usa sa mga principal sponsors nila mao si J.S. Bautista, editor kaniadto sa Banat News.

* * *

Trese ka tuig na kadto. Ug karon ang magtiayong Carmen ug Richard atua na nanimuyo sa Jersey City, New Jersey, USA, uban sa ilang duha ka anak babaye nga pulos hamtung na. Maayo ang ilang kahimtang sa kinabuhi didto sa Amerika. Adtong miaging Pista Senyor nibakasyon sila dinhi sa Sugbo ug nibisita sa opisina sa Banat News apan wala sila magkakita og si J.S. Bautista nga usa sa ilang ninong sa kasal.

* * *

Sa usa ka Christmas card nga ilang gipada sa atong editor, si Carmen ug Richard nipasalamat og dako sa Banat News diin sila una nagkaila pila na ka tuig nga milabay.

* * *

TRIVIA. Kumosta sa atong mga higala diha sa Natalio Bacalso Ave. Salamat sa inyong nagpadayong suporta sa Banat News.