Daghang nangamatay sa Ironman triathlon

Si kinsa man ang itudlo ni Pres. Aquino nga chief justice sa Korte Suprema puli sa natangtang nga si Renato Corona?

Nasayran nga ang Judicial and Bar Council (JBC) mipadala na ngadto sa pangulo sa walo ka mga ngalan diin pilian ang buot niyang itudlo nga chief justice. Ang nakakuha og labing minus lima ka botos, gikan sa walo ka mga sakop sa JBC, mao ang naapil sa short list. Ang nag-una mao si Acting Chief Justice Antonio Carpio nga nakakuha og pito ka botos.

Laing tulo ka mga associate justices - Roberto Abad, Arturo Brion ug Ma. Lourdes Sereno- tag-unom ka botos. Nakakuha usab og tag-unom ka botos sila si Solicitor General (SolGen) Francis Jardeleza ug kanhi executive secretary og San Juan Rep. Ronaldo Zamora. Si Associate Justice Teresita Leonardo-de Castro ug kanhi Ateneo law dean Cesar Villanueva tag-lima ka botos. Si Justice Sec. Leila de Lima na-disqualify sa JBC.

Ang gidungog nga pilian ni P.Noy mao sila si Associate Justice Sereno ug SolGen Jardeleza. Si Sereno maoy unang tinudlo sa presidente pagka-associate justice. Siya miboto tuod sa pag-apu-apud sa Hacienda Luisita ngadto sa mga mag-uuma apan uyon siya nga bayran ang mga Cojuanco og dakung kantidad nga sukwahi sa nauyunan sa mayoriyang hurado sa korte suprema. Si Jardeleza mao ang corporate counsel sa San Miguel Corporation nga gikontrolar ni Eduardo "Danding" Cojuangco, uyuan ni P.Noy.

Bisan tuod og anaa sa gahum sa presidente kun si kinsa ang iyang itudlo nga chief justice sa Korte Suprema apan manghinaut ako nga hinuktukan niya kini pag-ayo aron ang iyang mapilian dawaton sa kinabag-ang Pilipino inay nga makadawat siya og mga pagsaway. Dinhi makita kun unsa gayud ang tinuod nga tumong ug tuyo sa presidente sa iyang pagpa-impeach kang Corona.

* * *

Naguol ang katawhan sa kamatayon sa usa ka entrante sa lumba sa bisikleta nga maoy ikaduhang hugna sa Ironman triathlon nga gihimo sa Lapu-Lapu City ug milatas sa Cebu City ug sa mga siyudad sa Mandaue ug Talisay.

Samtang giisip kadto sa uban nga maoy nakahatag og dili maayo kaayong publisidad sa usa ka malampuson kaayong international event daghan usab diay nga nangamatay sa Ironman triathlon sa U.S.

Niadtong Sabado, usa ka entrante sa Ironman U.S. Championship sa New York ug New Jersey sa swimming nga may gilay-on nga 2.4 milyas sa Hudson river ang namatay. Duha ka laing mga tawo ang namatay sa swim portion sa Nautica New York City Triathlon niadtong summer. Usa gihapon ka lalaking atleta ang namatay sa New York City Triathlon niadtong 2008.

Dili gayud masiguro'ng luwas ang mga atleta nga moapil niining triathlon bisan kun anaa sa maayong kahimtang ang ilang panglawas. Aduna gayu’y panahon nga mopalyar kini tungod sa kakapoy niining maong paugnat sa kusog.

* * *

Bisan sa pangangkon sa ubang mga tawo, dili na malangkat ang kalampusan sa Lapu-Lapu City sa pag-host sa maong international event dugang sa duha ka Davies Cup (tennis tournament). Atangi ang dugang pang mga international sports events nga pasiugdahan sa Lapu-Lapu City.

* * *

Unsa may tumong ug tuyo sa Kapitolyo sa pag-abuno sa fishpond sa Balili property nga ilang gipalit? Daghan ang nagduda nga gihimo kini aron makakatarungan si Gob. Gwen Garcia nga wala siya masayop sa pagpalit sa maong luna.

Apan makatabang ba kini sa kaso nga gisang-at sa Ombudsman ngadto sa Sandiganbayan? Dili kaha hinoon kini makasamot sa iyang problema kay migamit na man usab siya og salapi sa Kapitolyo aron pag-ugmad sa yuta ilawom sa dagat nga maoy hinungdan sa iyang kaso nga giatubang karon?

Kun imong basahon ang mga balita sukad nabulilyaso kining maong transaksiyon atong makita nga nagkalainlain ang katarungan sa Kapitolyo sa katuyuan nila sa pagpalit sa maong luna. Unsa man gayud ang tinuod nga tuyo sa Kapitolyo sa pagpalit sa Balili property?

* * *

Email: [email protected]