Countdown gisugdan na

Gisugdan na ang 100-day countdown ngadto sa gitakdang kanonisasyon ni Beato Pedro Calungsod. Ang mga Sugbuanon maoy mipakita og dakong kasibot sa maong okasyon.

* * *

Si Pedro Calungsod maoy ikaduhang Pilipinhong santo human sa kanonisasyon niini. Busa ang kasibot ug kadasig dili kay ang mga Sugbuanon lang ang mopakita niini kun dili ang tibuok nasud nga Pilipinhon.

* * *

“Ang tanang parishes sa tibuok nasud moapil unta sa countdown nga gisugdan na dinhi sa Sugbo niadtong miaging Biyernes,” matud pa ni Andre Lopez usa ka lay minister.

* * *

Apan didto kuno sa ilang dapit sa Masbate wala nay nasayod sa maong 100-day countdown, suma pang Mr. Lopez. “Daghan pa man gani ang wa makadungog ni Pedro Calungsod,” matud pa niya.

* **

Kadaghanan sa mga parishioner sa Luzon “blind” pa kuno sa dakong selebrasyon nga gikasibotan sa mga Bisaya labi na sa mga Sugbuanon.

* * *

“Apan baya,” matud pa ni Andre Lopez, “usa ka taga-Luzon ang “initiator” sa pagka-santo ni Pedro Calungsod.” Siya mao ang tinahud ug pinanggang arsobispo sa mga Sugbuanon nga si Ricardo Cardinal Vidal.

* * *

Husto si Lay Minister Andre Lopez sa iyang awhag sa tibuok nasud nga magpakita usab og dakung kadasig kalabot sa umaabot nga “kanonisasyon ni Beato Pedro.

* * *

TRIVIA. Greetings sa atong mga higala diha sa Cantabaco, Talisay City, diin namugna ang labing unang parokya ni Beato Pedro.