Maadunahan ka man o anaa sa kakabos, managsama nga ato kini masinati ug dili gayud malikayan, kabahin man kini sa sistima sa pagkatawo, isip mabuot nga binuhat sa kahitas-an.
Hinuon gamay nga butang lang kini, apan daku na usab ang maidulot nga kadaut niini kun dili lang nato ni panumbalingon.
Ang Laay, nagagumikan kini sa pagbuhat nga kanunay wa gipalihok ang utok aron sabton nga may dedikasyon, nga igo lang gyud misagnunot sa naandan nga gibuhat. Hangtud nga kini inanay mopalyar ang panghunahuna.
Ang Puol usab,epekto kini sa pagpaabot sa gibuhat apan nadismaya kay wa matagbaw sa gihimo. Inanay motumaw ang ingon sa mohinay o maluya ang utok, nga kun magkagrabe, mosangpot kini sa talandugon nga pangisip.
Ang sum-ol pud, epekto ni sa pagkawa sa gana sa paglihok, pangisip ug pamatyag, gumikan sa ka way pagkaplag og dibersyon o alternatibo, nga miresulta sa pagtapol sa katakos sa pagderihir sa utok sa sistima sa kaalerto.
Ang tulo nga gituki nato, mao pa lamay mga sintoma o tilimad-on nga aduna nay angay natong buhaton sa inadlaw nga inutokay. Ato gayud hatagan og ehersisyo ang utok, nga okupado magpraktis sa pag-ilin-ilin sa tanang mga sitwasyon nga makat-on sa positibong kalihokan.
Permi sad hatagan og mga sustansya ang utok, aron mohimsog nga di basta mabuntog, malukapa, nga dili mawad-an sa paglaum–kundi molig-on sa pakigbisog nga madaugon…. unsa mang pagsulay o suliran nga mohasmag sa atong kinabuhi.