Ang pagka-Born Again Christian ni Pacman

Sukad pa kaniadto hangtod sa kataposang away ni Manny Pacquiao, diin si Juan Manuel Marquez maoy iyang gikaparang, nabatasan na gyud sa Pambansang Kamao ang pagpanguros sa dili pa magsugod ug sa pagkatapos na sa kombati. Atong hisaksihan nga siya moluhod pa gani, mohangad sa Langit ug mag-ampo sa Kahitas-an.

Gawas niini, inig hubo sa iyang sinina ibabaw sa ring, atong makita ang usa ka rosaryohan nga nagbitay sa iyang liog nga mapinanggaong mihawok sa bus-ok niyang dughan. Kang Mama Mary kini nga didto sa hilom nga lawak giampoan ni Mommy Dionesia, iyang inahan, nga unta panalipdan kanunay si Manny batok sa mga delikadong katalagman nga usahay mokalit la’g butho diha sa natad sa pamoksing.

Dinhay usa sa mga nanglabay’ng away ni Manny, diin samtang nag-ampo si mama Dionesia, kalit lang naputol ang gikuptan niining rosaryohan. Unsa kahay ipasabot niadto, no?

Daghan ang nagtuo, nga sinyales na kadto nga mabugto na ang kutay sa pagsige’g daog ni Manny sa boksing. Ubay-ubay sa mga fans, labi na kadtong kusog mopusta, ang nakuyawan. Apan nahanaw daw aso ang maong negatibong pagbati dihang wa gyud mapugngi ang padayong pagsaka sa ngalan ni Pacman sa tibuok kalibotan. Gani, siya man ang unang boksidor nga nahimong eight weight division title holder of the world. Kalamposan nga bisa’g unsaon pa sa pagpanghambog ni Floyd Mayweather Jr., dili na gyud maapsan. Dili gani matupngan!

Kini nagpaila lang unsa kahait nga hinagiban ang rosaryohan ang pagpanguros ug ang pag-ampo. Dinhi magsugod ang nag-ulan nga mga blessings nga miabot sa kinabuhi ni Manny. From rags to richest. Gikan sa kapait ngadto sa katam-is nga kinabuhi. Kini natagamtaman ni Manny ug sa tibuok niyang pamilya. Pagkanindot sa mga grasya nga gihatag sa Ginoo ngadtong Pacman. Busa, angay lang nga palipangon pag-ayo ang hugot niyang pagtuo ngadto sa Labaw’ng Makagagahom.

Mao ni hinungdan nga iya pong gisagop ang relihiyon sa pagka-Born Again Christian. Ang problema lang kay ang Born Again Christian dili mangurus. Dili motuog mga imahen sa atong Manunubos, mga Santos nga nagbarog sulod sa atong simbahan, mga relihiyosong gawi nga nalahi sa ato, isip mga Romano Katoliko.

Nindot unta, nga kun unsay naandang pag-ampo ni Manny kada-away niya sa ring, dili niya bag-ohon. Kinahanglan nga ipermanente niya kini sanglit puwerte niyang pangigo. Kinahanglan nga manguros lang gihapon siya. Mag-sul-ob og rosaryohan, muluhod ug mangaliya. Kay sa higayon nga usbon niya ang estilo: di na siya manguros, di na siya magkuwentas sa rosaryohan ug mao hinuoy iyang i-aplay ang mga bag-ong tambag sa iyang spiritual adviser, nahadlok kining tagsulat nga basig ang iyang winning streak, masilat -- sama sa gigunitang rosaryohan kanhi ni Mommy Dionesia nga kalit lang nabugto. Pastilan, ayaw intawon itugot, oh, among Ginoo!