Pangandoy sa mga vendors

Gihapsay ang mga merkado sa siyudad sa Sugbo sa dihang napiling mayor si Michael Rama. Apan angayan gyod nga bag-ohon kay dili na kaayo hamugaway agi’g pahaom isip Queen City of the South. Sama sa gibag-ong public market sa Carcar, Naga, Talisay, Mandaue, Lapu-lapu, Toledo ug Bogo City . Hinoon dunay mga vendors nga moreklamo kun magtukod og bag-ong merkado ilabina og distansya gikan sa lungsod o siyudad apan dili man maayo nga supakon ug babagan ang kalamboan.

* * *

Duha ka matang ang mga vendors. Ang nag-abang og stalls ug ang ambulant o sidewalk vendors nga nagbayad lamang og arkabala. Klaro ang panginabuhi sa nag-abang og pwesto kun itandi sa ambulant o sidewalk vendors nga anaa kanunay ang hulga sa demolisyon. Mao kini kasagaran nga nahitabo sa siyudad sa Sugbo. Nahitabo sab kini sa kalungsoran kansang mayor miusab sa hulagway sa ilang gubot ug hugaw nga merkado. Nanghilak ang mga tindera kay sila gikulban sa panginabuhi.

* * *

Nangandoy ang mga vendors sa dakbayan sa Sugbo nga maparihas sila sa mga senior citizens nga hatagan og financial assistance sa kagamhanan nga P5,000 matag tuig. Si Mayor Rama ra gyod ang makatubag sa maong pangandoy. Kanunay man god sila nga naproblema sa pohonan. Maoy nakatabang kanila ang mga Turko nga tigpatanto. Apan naay panahon nga makatabang og duot kay halos tanang adlaw maningil sa tubo. Daghan na hinoon nga nagkalisod ilabina og magpatuyang og pangutang sa daghang turko nga nagpatanto.

* * *

Maoy pangandoy sa mga vendor sa Plama, kilid sa CTU nga unta tugotan sila ni Mayor Rama nga makabalik og paninda sa kilid sa CTU. Nahawan na ang maong lugar karon human buldoza ang ilang mga payag sa miaging tuig. Nangandoy sila nga ang City Hall na mismo maoy mopatukod og mga stall aron igo nalang silang mag-abang.

* * *

Vendors ug mangomprahay sa new Mandaue Public Market dako’g natabang sa panudlanan sa siyudad. Mokita kini og P3M matag bulan gikan sa koleksyon sa parking, pansayan, suga ug rental sa mga stalls. Ang hamugaway ug limpyo nga merkado sa Mandaue nagatanyag og night market alang niadtong napakyas sa pag-angkon og stalls. Gidid-an na sila sa pagtinda sa palibot sa daang merkado ug sa National Shrine sa St. Joseph . Ang daang merkado sa Centro ug ang Bagsakan Center sa Ibabao-Estancia giingong tukoran og Delicacy Center alang usab sa mga vendors nga hilig sa maong klasi sa paninda. Ang New Mandaue Public Market nga migasto og P500M giablihan niadtong Enero 8, 2012. Upat ka mga brandnew nga mga electric cars ang nagserbisyo sa mga pumapalit. ([email protected]/0906-648-9637)