Sendong fund drive
ARTIKULO - Mar O. Rabaya () - May 8, 2012 - 12:00am

Sa Florida, dunay gipasiugdahang fund drive alang sa mga biktima sa bagyong SENDONG sa Pilipinas nga mikalas daghang kinabuhi ug dakung kadaut sa mga kabtangan sa katawhan. Puno sa mga Pinoy ang Sarasota Quadrangle niadtong higayona. Mitambong usab ang bag-ong miabot nga bisitang gobernador sa Pinas nga gitapuk-an pag-abiabi sa mga Pinoy. Pina-Rizal ang iyang hinapay ug maila gyud nga Pinoy!

Didto sa may unahan duol sa pultahan sa Quadrangle, may naglingkod sa lamisa uban sa iyang asawa. Nasigpatan siya sa nangulo sa fund drive ug gihunghungan ang gobernador: “Adto ta nianang naglingkod sa lamisa sa may pultahan..!” Milingi ang gobernador nga nakamay-ong sa nawong sa tawo nga nalingaw pagtan-aw sa nag-abiabi kaniya.

“Ang gobernador sa Sugbo...!”. Gipaila ang bisita ngadto sa naglingkod sa lamisa. Naglamano ang duha ug giagda pagpalingkod ang gobernador. Tapus makalingkod, pasiunang pangutana ngadto sa gobernador:

“Kuyog ka ba sa entourage sa presidente...?”

“Oo, oyyy! Tagsaon ra kining higayona nga way gasto!” Nagkanayon ang gobernador.

“Kumosta ang Sugbo, wa ba’y bagyong Sendong...?” Dason nga pangutana.

“Tua ra sa Iligan ug Cagayan moigo ang bagyong Sendong. Nangandam ang akong mga tawo sa hinabang alang sa Iligan ug Cagayan paggikan nako sa Pinas...!” Matud pa sa gobernador dungan ang pangigham.

“Unya, nganong nia ka man sa America ug gibiyaan mo ang Sugbo nga nangandam sa hinabang..?” Milurat ang mata nga nangutana sa gobernador.

“What are we in power for..?” Mapasigarbohong tubag sa gobernador. Naugpot ang nangulo sa fund drive sa tubag sa gobernador ug miingon:

“Excuse me, banggiitang reporter kanang giatubang mo, governor!” Namugnaw ang kalawasan sa gobernador pagkadungog sa pasidaan sa nangulo sa fund drive. Mora’g nahadlok nga nananghid mobalik siya sa pundok sa mga tawong nag-abiabi kaniya. Ug didto sa pundok, nangutana ang gobernador.

“Mora’g nakamay-ong ko sa nawong nianang tawhana. Kinsa ba ‘na siya?” Maikagong pangutana sa gobernador. Hapit magdungan pagtubag ang mga tawo sa pundok sa pangutana sa gobernador.

“Sir Mar Rabaya, famous broadcaster sa Balita Patrol, Station DYRC, Cebu City, Philippines. Siya karon ang Contributor sa Freeman/Banat Cebu, based in Florida...!”

“Bantug ra nga pintok ang iyang pangutana...!” ug nangurog ang kaugatan bahin sa iyang tubag ngadto kaniya samtang mikuha sab dayon sa papel ug ballpen ang nahisgutang reporter aron isaysay niya ang tubag sa gobernador sa ilang interview. (Kataposan)

BALITA PATROL BANAT CEBU CEBU CITY GOBERNADOR ILIGAN PINOY SUGBO
  • Latest
  • Trending
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with