Unsay apelyido sa illigitimate nga bata?

Happy Easter sa tanang suki sa Banat News. Nagkadaghan na ang misuwat kanako ug nangutana kun mamahimo bang mogamit ang anak sa apelyido sa iyang amahan bisan kun dili kasal ang iyang amahan ug inahan. Busa mao ni issue nga atong tubagon karon.

“ Dear Atty. Divine,

Good Day! Misuway ko sa pag-email kanimo tungod sa akong problema karon. Usa ko ka tinun-an sa kolehiyo unya napamabdusan ko sa akong boyfriend nga anak ug inilang pamilya. Wa pa mi plano nga magpakasal kay di pa mi andam apan sa sunod buwan gikatakda na ko nga manganak. Ang akong pangutana Atty. Divine kun mamahimo bang mogamit ang akong anak sa apelyido sa iyang amahan bisan kun di mi kasal? Unsay angayan nakong buhaton? — Cherry A.”

* * *

Cherry A,

Salamat sa imong pangutana. Basi sa Republic Act No. 9255 mamahimo ang usa ka illegitimate nga bata nga mogamit sa apelyido sa iyang amahan ug gawas sa maong balaod aduna pa gyuy provision sa Family Code nga anaa sa Art. 176 nga nagkanayon nga ang bata nga illegitimate mamahimong mogamit sa apelyido sa iyang amahan kun siya giila niini. Gituyo pagmugna ang maong balaod aron pagpakita nga ang pagka illegitimate sa bata di niya sala, busa way rason nga hikawan siya sa paggamit sa apelyido sa iyang amahan. Ang maayo nimong buhaton inigpanganak na nimo, imong papirmahon sa Birth Certificate sa imong anak ang imong boyfriend pagmatuod nga iyang giila o gi- acknowledge nga siya ang amahan sa bata ug mao nay gikinahanglan sa Civil Registrar aron ang imong anak makagamit sa apelyido sa iyang amahan. Buot ipasabot nga kadtong mga illegitimate children nga wa ma-recognized kon wa maila sa ilang amahan pinaagi sa public o private handwritten instrument dili makagamit sa apelyido sa ilang amahan ug ang apelyido sa ilang inahan maoy gamiton niini ug way middle name ang bata. — Atty. Divine

Kun pananglitan sa Birth Certificate sa illegitimate nga bata ang apelyido sa inahan mao na ang nabutang, mamahimo gihapon kining usbon ug isunod sa apelyido sa amahan pinaagi sa pag file og application sa Civil Registrar sa lugar diin natawo ang imong anak ug mosumiter lang ka ning mosunod: 1. Affidavit of Acknowledgment/Paternity nga gikan sa amahan ug dukomento nga nagpakita sa pirma sa amahan sama sa SSS ID. 2. Certified true copy sa Birth Certificate sa bata. 3. Affidavit to use the surname of the Father. 4. Valid ID sa mga ginikanan. Hinaut nga nahatagan mo og katin-awan kun unsay inyong buhaton kun ugaling nakasinati mo sa maong problema. LEGAL CORNER, Atty. Divine Marcial-Flores, c/o Banat News, corner D. Jakosalem and V. Gullas Sts., Brgy. Sto. Nino, 6000 Cebu City or email sa [email protected].