Indigay sa balak

Sa laing higayon ilusad na usab sa dyLA ang tinuig niini nga indigay sa pagtagik og gugmahanong balak.

Tumong sa maong indigay mao ang pagbuhi sa himatyon na nga kultura sa mga bisaya.

Tagsa naman lang gud kaayo sa mga batan-on sa pagkakaron ang makamao niini tungod kay dili na nato madunggan.

Nunot sa maong katuyoan gihimong matag tuig sa dyLA ang maong indigay aron pag-aghat sa mga batan-on nga mahiligon sa pagsuwat pagtagik sa ilang balak sa gugma.

Ang indigay abli ni sa tanang amateur nga mga magsusuwat. Mamahimo nga ipadala ang inyong entry pinaagi sa koriyo o ba kaha pinaagi sa email sa dyLA.

Ang katapusang pagpanawat sa entry karon nang Sabado Pebrero 11 sa hapon.

Ang mapili nga 10 ka mga finalist maoy magtigi sa dakong ganti nga nagpaabot.

Ang mga nagsuwat sa balak personal nga mo-deliver sa ilang balak karong Pebrero 14 atol sa Valentines Day didto sa Gaisano Metro activity center.

Dako ang ganti nga nagpaabot sa mga swerte nga mananaog sa maong indigay.

* * *

Sermon ray nahiaguman ni presidential adviser on political affairs Ronald Llamas sa iyang pagpalit of pirated DVD.

Gipahimangnuan hinuon siya sa presidente nga dili na usbon ang iyang gihimo tungod kay mas bug-at nga silot ang iyang mahiaguman sa sunod nga higayon.

Alang nako angayang tangtangon na ni Presidente Aquino si Llamas tungod kay ikaduha na kahigayon nga nalambigit siya sa kontrobersiya.

Una ang pagdala og mga high-powered firearms ug ang ikaduha ang iyang pagpalit og mga pirated DVD nga usa ka tataw nga pag-undermine sa kampanya sa gobyerno batok sa piracy.

Wala man tingali magkuwang ang Pilipinas og maayong materyal alang sa maong pwesto?

Kun dili makadisiplina si Aquino sa iyang mga amigo unsa may atong gipaabot nga resulta sa iyang kampanya?

Mao ba ni ang tuwid na daan nga iyang gisaad? Ang protehian ang iyang mga higala?

* * *

[email protected]