Ang adlaw, sama sa tubig, pagkaon, ehersisyo, hangin ug ang adlaw, usa usab kini ka batakan sa kahimsog sa panglawas. Ang iyang silaw o kahayag makapadasig sa atong panan-aw. Ang igong kainiton nga mabatyagan nato, makapalagsik sa atong panglawas. May sustansya kini nga makapalig-on sa atong pamanit. Ang init sa adlaw maoy kinaiyahan o natural nga bitamina E.
Kun way ayuda o madan-agan sa init sa adlaw ang atong lawas, daw dili mopiskay, ingon sa magluya kita. Sama sa tanom, kun mahayagan sa kainit sa adlaw, mobukhad ang bulak ug mga dahon, nga gikang nangyugpos sa kagabhion.
Matngoni nga igong kainiton lang ang pagdangdang sa lawas, aron nindot ug limpyo ang pamanit. Kun masobraan sab sa kainit, mamatay ang mga selyula sa atong panit, nga maoy hinungdan nga mokunot o mokuyos o makapatiguwang nato tan-awon.
Kun magpainit ka, kinahanglan ilihok ang kalawasan. Ayaw ipatara ang kaugalingon nga mora ka’g gibuwad. Kay dali ra motuhop ang sakit sa kainit sa adlaw, nga moresulta sa grabeng inpeksyons o skin ulcers o sakit sa panit.
Adunay bag-ong teknolohiya karon, nga modepensa sa panit gikan sa grabeng kainit nga di dali mahilos o masunog. Ginganlan kini og sun proof o sun block. Skin lotion nga ipahid sa panit. Anaa na kini sa mga botika. Apan mobalda kini sa sustansya sa panit, busa painit usa’g kadiyot una mogamit niani aron sa pagpugong sa kainiton sa adlaw.