Byahe ni GMA

Mamahimong lalisonon ang legalidad sa pagdumili sa Malacanang nga makabiyahe gawas sa nasud aron magpatambal si kanhi presidente ug karon Kongresista Gloria Macapagal Arroyo tungod kay wala pa may pormal nga kaso didto sa korte batok niya, apan dunay sukaranan ang kabalaka nga mosibat siya ug di na mobalik aron atubangon ang mga pasangil batok niya.

Wala man gud malilong sa publiko ang iyang pagpamakak kaniadto dihang misaad siya atubangan sa national telebisyon nga dili mopapili pagkapresidente niadtong 2004.

Lisud man gud bawion ang pagsalig sa publiko nga iya nang giguba. Busa bisan pananglit nagsulti siya sa tinuod wa nay ganahan motuo niya.

Gawas pa sihag kaayo ang iyang motibo pag-insister nga mobiya aron pagpatambal.

Kun ang tuyo niya mao lang ang pagpahiling og espesyalistang doktor sa iyang sakit sulbad na unta ang maong problema tungod kay mitanyag na si Presidente Aquino nga dad-on dinhi sa nasud ang espesyalista nga gusto ni Arroyo.

Nitanyag pa si Aquino nga ang gobyerno maoy moabaga sa galastuhan. Dili hinuon makiangayon kun ang katawhan maoy pagastohon sa pagpatambal ni Arroyo.

Apan ang tanyag ni Aquino gibalibaran ni Arroyo butang nga nakapasamot sa pagduda sa tinuod niyang motibo.

Kun tinuod wa siyay plano nga mokagiw angayan niyang dawaton ang maong tanyag.

Mas sayon ni kaysa siya maoy mobiyahe paingon sa gawas sa nasud. 

* * *

Maayong susihon sa Ombudsman ang lifestyle niining duha ka opisyal sa Bureau of Customs nga gireklamo sa usa ka concern citizen nga nagsunod sa akong tulomanon sa radyo. Ang duha ka opisyal ako nang gihisgutan dinhi sa miaging semana. Apan matud pa sa akong tinubdan nga inay mag-usab mipakita pa hinuon sa iyang pagkaarogante ang usa niini.

Sumala pa sa misumbong nako nga si CIIS Visayas supervisor Lyceo Martinez daw sa nakaminus pa sa mga bisaya.

Si Martinez uban sa hepe sa CIIS dinhi sa Sugbo nga si Bong Arevalo tunga nalang sa semana nga mo-report sa opisina.

Gani si Martinez giingong Biyernes na gyud nga moabot ug mopauli sab dayon sa kaulohan.

Unsa pa may iyang tuyo dinhi kun Biyernes na siyang moabot? Kun masayo-sayo og abot adto sab ni mopuyo sa mahalong hotel. Pila ra bay iyang sweldo? Unsa pa may iyang ipakaon sa iyang pamilya kun sa plete sa eroplano ug bayad sa hotel kada semana dili gani kini paigo?

Busa akong giawhag ang Ombudsman pagsusi niining maong reklamo.

* * *

[email protected]