EDITORYAL - Special treatment kang Santos?

Nabaniog nga gihatagan kuno sa kapolisan sa dakbayan sa Naga og special treatment ang usa sa ilang piniriso nga si Bella Ruby Santos.

Matud pa nga lahi sa ubang mga piniriso nga mga kabus, si Santos hayahay kaayo nga makagamit og mobile phone uban sa luho kaayong panlihok-lihok niini sa prisohan.

Apan   gipanghimakak kini sa mga kapolisang hingtungdan tungod kay alang kanila wala silay gipalabi, tungod kay ang tinarong nga pagdumala sa prisohan way giilang piniriso nga kuwartahan ug kabus kay ang tanan pulos tawo ug di hayop.

Ligdong kaayo ang pangatarungan sa kapolisan nga nakapahuyang sa  mga gipahayag sa mga akusador.

Dinhi mobilib ta sa baroganan sa kapolisan sa dakbayan sa Naga. Lahi sa mga guwardiya sa prisohan sa Bagong Buhay Rehabilitation Center sa dakbayan sa Sugbo dihang napaslak sa prisohan si Kongresista Ruben Ecleo kaniadto

Nabaniog usab kaniadto nga ang tanang pangandoy sa kinabuhi ni Ecleo sama sa usa ka gawasnong tawo gitugot ra kaniya didto sa iyang selda.

Gihatagan siya’g higayon paggamit sa iyang cell phone, nagkinahanglan siya og TV, VCD player ug uban pang mga makalingaw kaniya sulod sa selda, gihatag kaniya. Ambot kun tinuod ba to nga bisan babaye nga gikinahanglan gitugot usab, apan di ta motuo dayon niini kay human naman ang tanan. Unya gumikan sa kaharuhay ni Ecleo sa prisohan, kumo kay piniriso gimaldisyon siya sa sakit sa lawas hangtod nga giingong himatyon na siya ug giingong sama sa balon nga taliboto na nga buot ipasabot sa iyang doktor nga talandugon kaayo ang kahimtang niini.

Unya dihang gibuhian, nahisama kini kang Pagong nga dihang giingnan ni Matsing nga ilabay siya sa tubig kay maldito kaayo, nagpakilooy si Pagong nga “ayaw” gyud kay malumos siya. Si Matsing nga inosente kaayo sa kinabuhi  ni Pagong, misalibay niini sa tubig ug didto puwerting kulisiw ni Pagong og katawa kay nailad niya si Matsing, kay ang tubig maoy kinabuhi ni Pagong.

Busa na-congressman si Ecleo ug karon lig-on kaayo ang lawas nga gipasagdan nalang sa mga mananakop kay tawo lagi nga dungganan ug halangdon lahi sa ordinaryo ug kabus nga mga piniriso. 

Busa daghan kaayo ang nanagna nga mahisama niini si Santos, ambot kaha kun mao ba gyud kini ang mahitabo kaniya, panid-i ninyo ang dagan sa panahon. Di ba?