Ang drug mule ug ang whistleblower

Sa miaging semana maoy banner sa mga pamantalaang lokal ang pagkasikop sa usa ka Kenyan national nga nasakpan sa atong mga otoridad nga misuway sa pagpalusot og sobra sa tulo ka kilong shabu sa iyang pagtugpa sa tugpahanan sa Mactan ug ang pagkakaplag sa paingon na sa pagkadugta nga patay’ng lawas ni Bernard Liu. Ang kapin sa tulo ka kilong shabu nga nakuha gikan sa Kenyan national gibanabanang nagkantidad og 18 milyones ka pesos.

Ang langyaw nga nadakpan nga misuway sa pagpalusot og ginadiling drugas kalma ra kaayo ug daw wala mabalaka sa iyang kahimtang ug kinabuhi. Ang langyaw igo rang miingon nga wala siya makahibawo sa sulod sa maleta nga iyang gidala ug nga nailad lang siya sa iyang kauban.

Samtang si Bernard Liu dili na makaasoy kanato kun giunsa siya ug si kinsa ang nagpatay kaniya tungod kay paingon na gani sa pagkadugta ang patay’ng lawas niini sa dihang kini napalgan. Si Bernard Liu kauban ni Ananias Dy misaksi napulo na ka tuig ang nakalabay batok sa ilang amo nga si Peter ug Willington Lim nga nalambigit sa pagpayuhot og ginadiling drugas.

Tuig ang milabay human mosaksi batok sa ilang amo atol sa gipatawag nga Congressional inquiry kaniadtong tuig 2001 nga gipasiugdahan ni kongresista Tony Cuenco si Ananias Dy napriso tungod sa iyang pag-angkon nga siya ang nagdala sa shabu gikan sa Hong Kong sigun sa sugo sa iyang amo nga si Peter ug Willington Lim. Pagka tuig 2006 o lima ka tuig ang nakalabay human mobarog batok sa iyang mga amo, si Ananias Dy gibanhigan patay sa eskina Salvador ug Katipunan sa may Barangay Punta Princesa. Si Dy gipatay sa nagsakay og motorsiklo nga mamumuno.

Sa miaging semana human molabay ang napulo ka tuig sa iyang pagbarog batok sa iyang mga amo, si Bernard Liu na usab ang napalgang patay sulod sa iya mismong panimalay sa may dakbayan sa Talisay. Si Liu namatay tungod kay gituok sigun sa otopsiya nga gihimo sa mga police ngadto sa patay’ng lawas niini. Kun si kinsa ang nagpatay ug kun unsa ang hinungdan sa pagpatay kang Liu mao kini karon ang misteryo ug tanghaga.