Arithmetic ni Rama

Nabatasan sa kadaghanan sa mga lokal nga mga opisyal ang pagyangungo og proyekto gikan sa nasudnong kagamhanan alang sa ilang tagsa-tagsa ka mga dapit.

Mao man gani nga ang sagad sa lokal nga mga politiko maglumba og pasakop sa partido sa administrasyon tungod sa mehoras nga ilang makuha. Apan dili nako masabtan nganong ang mayor sa dakbayan sa Sugbo nga si Michael Rama namalibad sa duha ka dagkong proyekto sa flyover dinhi sa dakbayan.

Inay manghangyo ngadto sa Malakanyang nga madali ang pag-release sa pundo alang sa proyekto gihangyo naman hinuon si Presidente Benigno Aquino III nga isuspenso ang pagpagawas sa pundo alang sa duha ka mga proyekto’ng flyover ni Kongresista Cutie del Mar.

Si Del Mar una na nga mipahibawo nga andam na ang pundo alang sa duha ka mga flyover nga tukoron diha sa mga dalan Gorordo ug Archbishop Reyes aron ma-arang arang ang dagan sa trapiko sa maong dapit.

Kun dili man gud nato magamit ang pundo nga gitagana niini mahibalik kini sa panudlanan sa gobyerno human sa tuig ug maglisod napud ang atong mga opisyal pagpangayo og laing pundo.

Si Rama supak sa katukoran sa duha ka flyover tungod sa rason nga dili kuno kini maoy sulbad sa kahuot sa trapiko sa maong dapit. Gusto niya nga maoy unahon ang road-widening tungod sa iyang pagtuo nga mao ni’y sulbad sa kahuot sa trapiko.

Husto si Rama, ang flyover dili hingpit makasulbad sa kahuot sa trapiko sa maong dapit. Apan mouyon siya ug sa dili makatabang ang flyover aron maminusan ang problema.

Bisan ang iyang gitinguha nga pagpalapad sa karsada dili maoy hingpit nga sulbad sa problema sa trapiko dinhi sa dakbayan tungod kay ang kamatuoran mao nga nag-anam gyud og kadaghan ang sakyanan dinhi sa Sugbo.

Mamahimong sulod sa pipila ka tuig temporaryong moluag ang dagan sa trapiko kun atong palapdan ang karsada apan dili kini moluntad og dugay, sama nga dili sab hingpit nga makasulbad sa problema ang flyover.

Apan tali sa duha ka mga paagi paghatag og alibyo sa suliran sa trapiko, mas practical ang flyover tungod kay mas minus ni og gasto kun itandi sa road-widening.

Gihuna-huna ba ni Rama unsa ka dako ang pundo nga gikinahanglan pagpamayad sa luna nga maigo sa road-widening? Pila man ang presyo sa yuta diha sa maong mga dapit? Sa yuta lang daan sigurado nga magbakutot ang gobyerno og bayad sa acquisition sa road-right- of- way wala pa ni labot sa mga buildings nga maapektuhan.

Ibutang ta lang og P10 mil ang presyo matag square meter sa luna dihang dapita tungod kay commercial area naman ang maong dapit, pila man kahay kinahanglanon nga kantidad?

Dili sab mahimo nga ang karsada nga atong palapdan diha lang sa tungod sa intersection tungod kay wa ni’y kapuslanan kun dili nato palapdan ang tibuok Gorordo ug Archbishop Reyes.

Unya duna tay kwarta nga ikabayad? Dili man gani mobayad si Rama sa P133.4 milyones ngadto sa pamilyang Rallos isip bayad sa luna nga gigamit nga karsada sa dakbayan. Hain naman ang arithmetic sa mayor?

* * *

[email protected]