Mga kurakut

Naguol ko nga nakabasa sa report sa Commission on Audit (COA) nga naghisgot sa kahimtang karon sa mga abyon ug ubang matang sa aircraft sa Philippine Air Force. Pastilan, ang PAF dunay kapin sa 300 ka lainlaing mga aircraft sama sa plane ug helicopters, apan abi ninyo og pila na lang ang magamit? Matud sa COA nga 91 na lang ang magamit.

Kaluoy tawon sa Pilipinas kay sa pagtandi nako sa gidaghanon sa mga air assets sa ubang kanasuran sama sa Thailand, Singapore, Hong Kong ug ubang nasud sa Asya, kita ra ang kinagamyan og mga aircraft.

Kini maoy rason nga sayon-sayonon ra kita sa ubang mga nasud, ilabi na sa China, nga ilogon ang gikabangian nga bahin sa Spratly Islands. Sayonan ka nga dihang ang China nagpadala og barko nga panggubat didto sa gikabangian nga isla sa Spratly kita nagpadala usab og barko. Apan ang gipadala nato nga barko ngadto sa maong dapit sa Spratly usa ka karaan na kaayong barko sa Navy nga kapin na sa 40 ka tuig nga misikat. Nag-asu-aso tawon ang panghaw sa barko. He!He!

Ang ato usab nga mga abyon nga igugubat karon karaan na kaayo nga tingali kusog pang molupad ang langgam nga manatad. Paita! Unsaon nga kun dunay budget sa pagpamalit og kahimanan, usahay pangwartahon man.

Sumala unsay gibutyag ni Kongresista Tommy Osmeña nga nasakpan niya nga mopalit na unta ang kagamhanan basi sa rekomendasyon sa militar, ug barko nga mahal kaayo bisan og karaan.

Unya, duna pay “ghost soldiers” nga moabut og 20,000. Sayonan ka ang sweldo sa maong mga sundalo mahipunta ra sa bulsa sa maong mga mapahimuslanon.

* * *

Maayo kay gidistinohan g’yud kagahapon og mga polis ug sakop sa City Traffic Operations Management (CITOM) ang tungasan nga bahin paingon sa barangay Busay.

Sa ingon nga paagi mapitol ang kamasinupakon sa kadaghanang mga drayber og “habal-habal” nga motorsiklo. Giisip nako nga mga higala kadtong mga drayber sa motorcycles-for-hires nga motuman sa balaud.

Prangka lang ko nga maglagot ko nga magtan-aw sa mga drayber nga dili motuman sa mga lagda nga gilatid kanila. Unya kun madakpan hapit na lang mohilak ug moluhod aron sila dili dakpon. Sama gud sa pagsul-ob og crash helmet, pagbutang sa mga gikinahanglang kagamitan sa motorsiklo sama sa side mirrors, mga suga ug uban pa, nganong dili man gayud kana tumanon?

Unya kun may suga man gani ang mga motorsiklo, dili usab pasigaon ug ang uban ponder ang bombilya mao nga dili mosiga panahon sa gabii. Apan labaw sa tanan mao nga ang ubang nagmaneho og habal-habal, walay lisensya. Ang ubang motorsiklo nga gigamit og habal-habal wala na marehestro sa Land Transportation Office (LTO) ug maisip na nga wala tuguti sa pagdagan-dagan sa atong mga karsada.

Sa pagparehestro sa sakyanan sa LTO, apil na diha nga gibayran ang gitawag og “road users tax” mao nga kadtong mga sakyanan nga expire na ang rehestro wala nay katungod nga modagan-dagan diha sa karsada.

Duna g’yuy mga motorsiklo nga nasakmit kagahapon. Miminus gud ang mga habal-habal nga motorsiklo nga mibiyahe kagahapon.

Alang nako walay problema kun mamasahero ang gitawag og habal-habal apan kompletohon lang ang gikinahanglan.