Si Anakin

Maayo unta nga Jedi Knight si Anakin Skywalker ug gani taas unta ang paglaum sa iyang mentor nga si Obi Wan Kenobi nga siya maoy magdala og balance sa puwersa. Apan kay wala kaayo niya masumpo ang iyang dili haom nga pagbati ug panlantaw siya nailad ug sa kadugayan nahimong Darth Vader.Gisanapan sa tumang ambisyon ug ang iyang kanhiay’ng kusog maoy nibuta kaniya ngadto sa wala’y katapusang kalaglagan. Ug gani sa katapusang yugto ang iyang hinigugma nga buot niyang panalipdan nga si Padme Amidala ang nagpanglingo-lingo dungan ang pag-ingon: “Wala nako makaila kanimo!”

Mata’g usa kanato ang dunay posibilidad nga mamahimong sama kang Lord Darth Vader kun dili kita maantigong mohimo og tukmang balanse sa atong kinabuhi. Ayaw pagpagarbo sa imong kusog kay hibaw-i baya nga luyo sa maong kusog anaa pud ang imong kahuyang. Diha sa pag-alinggat sa imong kahuyang anaa ang sinugdanan sa imong pagkahimugso pag-usab ingon nga nabag-ong tawo. Maingon nga ang kanhiay nindot ug komportableng kalambigitan sa usa ka Padme sa imong kinabuhi dili mahimong ilubong lamang sa kalimot. Kay siya mobalik-balik gyud ingon nga urom sa imong mapait nga kagahapon. Apan dili mahimo kay siya mismo nga imong hatagan unta sa kinatibuk-an ang nibudhi man kanimo. Nga sa ato pa, dili siya ang Padme nga mounong kang Anakin kondili ang Count Doku nga nakigbatok kang Master Yoda.