Wikang Pambansa

Tatlong araw na lang at matatapos na

Ang Buwan ng Wika sa loob ng bansa;

Mga tula’t awit sa sariling wika

Muling papalitan ng himig banyaga!

Kung Buwan ng Wika ating mapapansin

Sa radyo at TV ang mga awitin

Saka ang salita ng mga announcer

Sinisikap nilang maging Tagalog din!

Sapagkat Tagalog ang Wikang Pambansa

Huwag munang gamitin ang ibang salita;

Sa kalye’t sa loob ng mga eskwela –

Dapat mag-Tagalog ang matanda’t bata!

Sana nga’y di lamang sa iisang buwan

Ang Wikang Pambansa ating iwagayway;

Hindi ba’t si Quezon noong nabubuhay

Tagalog ang wikang kanyang ibinanghay?

Saka ang pangulong ngayo’y nasa trono

Nitong ating bansa’y maka-Pilipino;

Sa mga okasyong siya’y dumadalo

Sa pananagalog hindi sumusuko!

Dayuhan at hindi ang kanyang kaharap

Si Pangulong Noynoy Tagalog ang bigkas

Sa lahat ng dako kapag nangungusap –

Ang bawa’t salita Tagalog na tapat!

Kaya itong bansa’y may dalwang patnubay

Sa pananagalog ay walang kapantay;

Mga wika nila kung ating pakinggan

Tagalog ang dala sa tuwid na daan!

Naunang nawala si Pangulong Quezon

Na Wikang Pambansa dakilang abuloy;

Siya ang nag-utos tayo’y magkaroon

Ng sariling wika sa habang panahon!

Sumunod si Noynoy kung nagsasalita

Laging ginagamit ay Wikang Pambansa;

Halimbawa niya ang sundin ng madla

Upang itong bansa’y ganap ang paglaya!