Ang politika ni Tomas

Wala nay undang ang mga kalihokan ni kongresista Tomas Osmeña alang sa iyang posibleng pagbalik sa City Hall o ba kaha alang sa iyang hinanib nga gusto niyang iparang kang Mayor Mike Rama kun ugaling dili siya magpapili sa pagka Mayor unya sa 2013 nga bugnong lugaynon. Ang tanang gihimo sa kongresista gitumong sa pagpalig-on sa iyang partido. Mao kini ang hinungdan kun nganong nakighigala na siya sa iyang mga kaatbang sa politika.

Una gisigihan na niya og bantay ang mga kalihokan ni Mayor Mike Rama ug gisigihan usab sa pagsaway. Sunod nakita nato sa pamantalaan ang dagway sa pipila ka mga kapitan sa dakbayan sa Sugbo nga sakop sa Kusog nga nakauban na sa kongresista atol sa iyang adlaw nga natawhan. Karong bag-o gipasaylo sa kongresista ug gipabasura sa hukmanan ang kasong libelo nga iyang gipasaka batok sa iyang higpit nga kaatbang sa politika nga si magpapatigayon Atan Guardo.

Kining tanan mga pamaagi sa kongresista sa pagpalig-on sa iyang partido ug kagrupo. Haniti ug suhito na kaayo ang kongresista niining maong matang sa pamolitika tungod kay mao kini ang iyang antiks. Kun sa tanaw sa kongresista magamit ka niya iya gyod ka nga higalaon apan kun dili na iitsapuwera ka.

Kon higala ka na niya kinahanglan nga magpaitoy-itoy ka gyod niya kay kun dili awayon ka ni Tomas Osmeña. Mao ni ang iyang gihimo sa kapitan sa Barangay Guadalupe nga si Jingjing Faelnar, kanhi Mayor Alvin Garcia ug karon Mayor Mike Rama.

Karon ang mga kapitan na usab nga kaalyado sa kusog ug ang magpapatigayon nga si Atan Guardo ang iyang gisuwayan ug gilarawan nga gamiton alang sa iyang pamolitika. Hinuon pulos ni sila mga politiko ug ako nasayod nga nakahibawo ni sila sa laraw ni Tomas, wala lang upod ni sila maglangas kay gusto upod nilang gamiton si Tomas. Sa politika ugod uso ang ginamitay. Pero kun silang mga politiko mogamit ug magpagamit sa parihas nila og kolor, kitang katawhan dili unta.