Sunog tungod sa baha

CEBU, Philippines - Nakasinati na usab kita og grabeng baha niadtong kataposang adlaw sa Hunyo diin dili mominos tulo ka oras nga pagbunok sa ulan atong nasinati dinhi sa dakbayan sa Sugbo.

Maayo nalang gani kay dili sama sa Davao diin ubay ubay intawon ang nakalas sa grabeng baha didto.Unsa may posibleng mahitabo kun makasinati kita og baha? Una, mangabasa gyud ang atong mga electrical appliances ug uban pang mga gamit sa atong panimalay.

Kay lagi basa man ang atong mga de-kuryenteng appliances dako kaayo ang posibilidad nga duna na kini depekto o kadaot. Busa atong pahimangnoan ang publiko nga kun mahitabo man gani nga mabasa gumikan sa baha ang inyong mga appliances kinahanglan nga inyo kining paugahon ug ayaw dayon kini og gamita aron makasigurado kita nga luwas kini sa pagbuto o ba kaha sa sunog.

Labing maayo og inyo kining ipahiling og technician aron masuta og wala ba kini madaot. Gawas nga mabasa atong mga gamit sa panimalay, dako pud ang posibilidad nga mabasa ang atong mga outlets kun saksakanan sa atong mga de-kuryenteng appliances.

Unsa man ang posibleng epekto niini? Mamahimong mo-ground sanglit duna may buhing supply sa kuryente ug kun dili mobuto ang circuit breaker aron maputol ang supply niini.

Dako ug taas kaayo ang posibilidad nga ma-kuryentehan ang mga tawo nga anaa sulod sa panimalay nga nabahaan. Unsa may angayan nga himoon? Labing maayo nga kun sa inyong tan-aw dunay posibling baha, e-off nalang ninyo inyong plangka o circuit breaker aron hingpit kamong luwas sa sunog ug sa pagka kuryente.

Ug labaw sa tanan, mas maayo nga ipa-check ang atong electrical wiring sa usa ka lisensyadong electrician aron matino ug luwas ba kini nga gamiton sanglit miagi man kini pagkabasa.

Mas maayo nga duna kitay bisan gamay lang nga idea kun unsay buhaton panahon sa baha aron mamahimong luwas kita sa disgrasya.

Sa pikas bahin, mipahigayon og fire safety ug first aid lecture ang mga personnel sa Toledo Fire Station pinangulohan ni SR INSP RANDY MENDAROS ang City Fire Marshal ngadto sa mga sakop sa Toledo City Jail. Gihatagan gyud og igong panahon ug importansya ang kamahinungdanon sa fire safety sa maong jail facility aron mamahimo kining luwas sa sunog ug kun ugaling dili kini malikayan, makamao na unya mopahimutang ang mga jailguards mogiya sa mga piniriso aron kini dili mapaig sulod sa bilanggoan.

Hinaut nga ang maong paghimo og lecture regarding fire safety himuon usab sa mga nagkalain-laing mga jail facility dinhi sa Sugbo.