Patay na nga kaya si Bin Laden?
at sana papalit ating kadamdamin;
Matagal nang lubhang ang daigdig natin
saklot ng pangamba’t lugmok sa hilahil!
Sana nga’y wala nang pumalit sa kanya
upang pamunuan mga terorista;
Kung may papalit man dapat iba siya’t
kanyang bubuwagin ang grupong Al Qaeda!
Nakapagtatakang itong si Bin Laden
naging lider siyang iba ang damdamin;
Ang kanyang doktrina’y mabuhay sa dilim
mabuhay lang siya – tayo’y papatayin!
Mahabang panahong siya’y terorista
tahimik na mundo’y ginugulo niya;
Mga president, mga hari’t reyna
ang tanging layunin ay madakip siya!
Mga pambobomba at mga pagpatay
sa maraming bansa kanyang pinairal;
At ngayong patay na masamang kaaway
wala nang Osamang kinatatakutan!
Mabubuting tao’t masasamang tao
parehong binuhay ng Diyos sa mundo;
Kung saan papanig ang buhay na ito -
nasa gintong panig tayong Pilipino!
Tayong mga Pinoy ay laging tahimik
hind pumapanig sa grupong malupit;
Kailanman di tayo lumabas sa guhit
ng kapayapaang kaloob ng langit!
Oo nga at dito’y marami ring hudas
na ang gawi’t kilos lubhang mapangahas;
Pero itong bansa ay may mga batas
na dapat igalang ng mga pahamak!
Kapalit ni Laden at mga kasama
ipagdasal nating destino’y iba na;
Ang kapayapaan ang yakapin nila’t
ang planeta natin magiging masaya!