Luyo sa paningkamot sa atong gobyerno nga dili madayon sa pagbitay ang tulo ka Pinoy sa China, nadayon gyod sila sa pagpatay agad sa gisilot kanila. Personal nga nakigkita si Bise Presidente Jejomar Binay sa mga kadagkoan sa China aron paghangyo nga paubsan ang silot nga gipahamtang kanila ni Sally Ordinario-Villanueva, Ramon Credo ug Elizabeth Batain. Nakombikto ang tulo tungod sa pagpayuhot sa gidiling droga sa China.
Ang maong paningkamot sa atong gobyerno usa ka pagbati sa kaluoy ngadto sa tulo nato ka igsoong Pinoy. Apan ang nadayong pagbitay sa tulo usa ka timailhan nga adunay lahing pagbati ang gobyerno sa China.
Usa kita ka nasud nga nagbaton og demokratikanhong sistema. Samtang ang China nagbaton og gobyerno nga komunista. Niini pa lang, ato nang matugkad ug masuta nga adunay managkalahing pagbati ug balaud ang atong gobyerno ug ang gobyerno sa China.
Busa man ugaling napunta sa pagkawalay kapuslanan ang pagpaninguha sa atong kagamhanan nga masalbar ang kinabuhi sa tulo ka Pinoy. Bisa’g kinsa pa ang atong presidente, bisag kinsa pa ang naghangyo sa gobyerno sa China, madayon gyod ang pagbitay kanilang tulo. Ang nahitabo kanila naghatag og dakong pagtulun-an sa uban pa natong kaigsuonan nga nangandoy nga manarbaho sa gawas sa nasud. Bisag dili sa China. Dili angay nga mosuong dayon sa mga pasalig sa mga tawo nga kunohay motabang apan diay usa ka trabaho nga ilegal ang maangkon nga mopatislaob sa huyunghuyong nga molamoy sa tawo nga nabiktima ngadto sa kadautan.
Dili nato mabasol ang mga nabiktima nga nahiagom sa kaalaotan kay tuyo nila nga haw-ason sa kalisod ang ilang pamilya, nga mahatagan og kaharuhay ang mga minahal nila sa kinabuhi. Apan ang mga salbahis nga illegal recruiter maoy nagdala kanila sa sulod sa presohan ug kamatayon ngadto sa laing nasud.
Kining maong mga illegal recruiter ang gukdon gyod sa atong gobyerno. Pahamtangan sila og hustong silot agad sa atong balaud. Dili angay pasanayon kining mga tawhana kay dangan sila sa kaugmaon sa atong mga igsoong Pinoy nga gustong manimpalad sa laing nasud. Kaugalingong interes ug kaayohan lang ang gilantaw niining mga tawhana sa walay pagtan-aw nga sama kanilang mga Pinoy ang gilawog nila sa kaalaotan. Unsaon na lang kun makombikto sila sa nasud nga adunay lahing pagbati ug balaud nga gobyerno kay sa pagbati ug balaud sa atong gobyerno? Makaluluoy gyud sila. Dili na angay nga mahitabo pa sa ubang mga Pinoy ang nahitabong pagbitay kanila ni Villanueva, Batain ug Credo.