Piangon na si Bella Ruby Santos

Gipugngan na sa gobyerno ang tanang account ni Ian Charles Griffiths dinhi sa Pilipinas diin adunay access ang uyab niining si Bella Ruby Santos ang suspetsado sa pagdagit ug pagpatay kang Ellah Joy Pique.

Tungod niini mihinay-hinay na sa paghunas ang lawom nga panudlanan ni Ms. Santos ug hinay-hinay na usab nga gipiangan sa pagpanalipod sa iyang kaugalingon sa kasong giatubang. Dinhi ugod sa Pilipinas kuwarta ang nagdala sa bola sa kaso. Tungod sa kuwarta mas nakabintaha ang mga adunahan nga nag-atubang og kaso tungod kay makakuha man sila og mga abogadong dekampanella. Sama ni Ms. Santos, kay lawom ang iyang panudlanan nakakuha siya og abogado nga mahalon nga nakabasi sa Makati ug lain pa gyod nga abogado nga nakabasi dinhi sa Sugbo.

Apan karon nga gipugngan na ang mga account ni Griffiths dinhi sa Pilipinas hinungdan nga dili na maka-abli niini si Ms. Santos, ambot kaha og makasugakod pa ba ang iyang winad-waran sa pag-abaga sa gastohanan sa kasong iyang giatubang.

Ang pagpugong sa gobyerno sa mga account ni Griffiths dinhi sa Pilipinas aron dili magamit ni Bella Ruby Santos sa duwa pang basketball foul. Kay unsa bay labot sa account ni Griffiths sa kasong gipasaka batok kang Ms. Santos. Ang account ni Griffiths makapamatuod ba nga si Santos maoy nagdagit ug nagpatay kang Ellah Joy Pique? Ang account ni Griffiths makapamatuod ba nga gigamit kini sa paghimo sa krimin ngadto sa batang biktima?

Klaro ug tataw nga ang tumong ug tuyo sa pagpugong sa pag-abli sa mga account ni Griffiths dinhi sa nasud aron dili magamit ni Ms. Santos gituyo aron mapiangan ang naulahi ug aron dili na makapanalipod pagmaayo sa iyang kaugalingon sa kasong giatubang. Kini para kanako dili makiangayon ug gawas na sa gitawag nga fairplay.

* * *

Para sa inyong mga komento ug reaction ipadala lang kini sa [email protected].