Ayaw'g paghinambogero

Awhagon nako kadtong mga tawo nga nagpasakop isip mga “assets” o “confidential agents” sa lainlaing mga law enforcement units nga dili kaayo magpalabi sa kahambog.

Ayaw ipasaya-saya ang inyong pagka sakop sa maong mga kahugpongan kun wala kini kinahanglana. Ang gipasabot nako mao nga tipigi ang inyong “identity” nga dili kamo “masunog.”

Awhagon nako ang kadagkoan sa Lungsod Batok Salaud (Lubas) nga disiplinahon ninyo ang inyong mga sakop. Usbon nako, tagoi ang inyong “identity” nga sakop kamo sa maong grupo aron kamo mapuslan. Sagad man gud nako mabantayan nga ang mga Identification Cards (ID) sa pipila ka sakop niining maong grupo tuyoon g’yud nila nga anha isukip uban sa ilang driver’s license plastic holder.

Resulta, kun mo-agi sila og mga checkpoint operation nga magkinahanglan kanila nga mopresentar sa ilang driver’s license, iapil nila pagtunol ang ilang ID pagka sakop sa Lubas ug uban pa.

Nasinati nako kini kaniadtong miaging gabii. Wala ko makapugong gawas sa pag-lecture sa maong sakop sa Lubas kay wala ko makagusto sa iyang batasan.

Duha na ka tuig ko nga nahimong deputized agent sa Land Transportation Office (LTO) apan wala g’yud ko makasinati nga dunay mga nadakpan nako nga nakalapas sa balaud sa tukmang pagmaneho nga nagpailang sakop sila sa respitadong police ug military intelligence units.

Kana maoy husto, dili maghinambugero. Diha sa’y nasakpan sa maong operation nga nagpaila nga sakop sa “Media” kay reporter kuno siya sa radyo basi sa iyang ID.

Apan kay nakahimo man siya og sayop, ilabi na ang pag-drive og sakyanan nga walay suga, wala kami’y mahimo gawas sa pagdakop kaniya kay aron pagpakita nga patas kami sa Task Force Alpha nga manakop.

Duna pay usa ka ilado nga tawo dinhi sa Sugbo nga tingali madakpan pipila ka adlaw gikan karon kay sagad dili gayud mag-helmet nga mag-drive sa iyang motorsiklo ug mora’g expire pa ang rehestro.

Ayaw g’yud mo pagsalig nga abi kay ilado kamo sa katilingban dili na kamo dakpon kun dili motuman sa tukmang pagmaneho’g sakyanan. Mohangyo lang ko ninyo nga tumanon nato ang tukmang lagda aron dili kita madakpan.

* * *

Paspas ang uwan-uwan karong panahona. Nagpasabot nga modagsang na usab unya ang dengue ug makahulga sa atong kinabuhi. Magbantay kita pinaagi sa pagpangyabo sa mga tubig nga maglim-aw diha sa atong palibut, unya limpyohan nato ang atong balay kay kun mag-uwan ang mga lamok mosulod sa panimalay.

Karong buntag, ang mga sakop sa Cebu City Health department mang-apod-apod na usab og mga net curtains nga dunay kemikals nga makapatay sa lamok diha sa Talamban Elementary School ug Mabolo Elementary School.

* * *

Tungod kay ang atong weather bureau, ang Pag-asa, dili na man kasaligan sa ilang paghatag og bana-bana sa panahon, daghan karon ang mitumaw nga report nga makapakuyaw.

Ang report mao nga kusog kuno kaayo ang bagyo, katuloon ang gikusgon adtong uwan nga miigo dinhi sa dakbayan sa miaging semana, ug makamugna kini og lunop.

Pastilan. Sigurado nga gihubag-hubagan sa kakuyaw ang mga nagpuyo diha sa kasapaan. Ayaw tawon ninyo pun-i ang kakuyaw sa mga lumulopyo diha sa danger zone uy.