Pasiuna

Karong Domingoha ang gitawag og Gaudete Sunday (koun Domingo sa kalipay ug pagmaya) kini tungod kay hapit na gyud ang gipaabot nga adlaw diin ipahimugso ang Emanuel, ang Dios uban kanato. Si Juan Magbubunyag ang tingog sa kamingawan kang kansang pagtulon-an ang nakasentro sa Moral nga Pagkakabig ang nabilanggo gumikan sa iyang makanunayong paghukngay (Hukom-Angay) sa immoral nga binuhatan ni Herodes sa dihang nakadungog si Juan kalabot sa mga gipanghimo ni Jesus, iyang gipadala ang iyang mga tinun-an sa pagpangutana kun si Jesus ba ang Mesiyas nga dugay nang gipaabot. Inay pagatubagon ang maong pangutana sa Oo o dili, si Jesus ang mihimo og usa ka pasumbingay ginamit ang panagna ni Propeta Isaias (cf. Is. 35;5-6) nga nagkanayon: “Makakita na unya ang buta, ug makadungog na ang bungol maglukso-lukso na ang bakol daw lagsaw, ug mag-awit ang amang sa kalipay, kay didto sa kamingawan, modagayday ang tubig ug may mga sapa na ang disyerto.” Mga timaan kini nga ang kaluwasan haduol na ug ang Dios maghari na.

Pagpalawom

Lahi ang pamaagi sa Dios ug ang pamaagi sa tawo. Ingon ini usab ang tawhanong pagsabot sa Mesiyas kaniadto. Ang Mesiyas alang sa katawhan sa Israel mao ang usa ka Politikanhong Pangulo nga maoy mopalingkawas nila gikan sa kaulipnan sa mga gahom sa mga langyaw. Apan ang matang sa Pagka-Mesiyas sa atong Ginoong Jesus ang nagasukad sa usa ka malinawong pag-uli sa katawhan ngadto sa pagkatibuok niini. Linangkob ang pagka-Mesiyas ni Kristo. Buot niya nga maluwas ang tawo sa kinatibuk-ang aspeto niya. Si Juan sa iyang mga katapusang yugto sa kinabuhi mapadayunong namalandong sa mga panghitabo. Nakadala ba kini sa iyang pagkawalay paglaom ug kahadlok? Ang tubag wala. Kini tungod kay natataw ni Juan Magbubunyag ang iyang tahas ingon nga Precursor kon tig-una sa Mesiyas.

Implikasyon niini sa atong inadlaw ug Kristohanong pagkinabuhi

Adunay mga higayon nga lisud kaayo sabton ang pamaagi nga Diosnon. Sama ni Juan paggahin og pipila ka gutlo sa pagpamalandong aron imong makita ang Dios diha sa imong mga naandang mga buluhaton adlaw-adlaw.