Fire volunteer brigades

Daghan ang nag email nako ug nagpakisayod kabahin sa pag tukod og volunteer fire brigades nga buot nilang mahimo sa ilang mga barangay. Ang inyong mga hunahuna ug plano usa ka dako ug mapuslanon kaayo nga lakang aron sa maong paagi atong mapalig-on ang pwersa sa atong kabomberohan sanglit ang maong mga fire brigades mao na ang magsilbing first responders sa ilang tagsatagsa ka barangay sa dili pa moabot ang mga sakop sa atong kabomberohan.

Sa kadtong buot magtukod niini, palihug og coordinate sa matag fire station nga duol sa inyong lugar ug pahibaw-a dayon ang mga hepe sa maong istasyon aron kamo magiyahan sa inyong pagabuhaton. Aron mahingpit gyud ang inyong pagka volunteer, kinahanglan kamo nga maka attend sa among mga trainings ug lectures kabahin sa basic firefighting ug uban pa.

 Kining maong mga trainings ipaambit kini sa inyong kabomberohan nga libre ug walay bayad. Busa ayaw kamo pagpanuko o pagduhaduha sa pag-approach kanamo. Ang pag alagad ug ang pagpaambit kaninyo sa among nakamahoan sa natad sa pamombero dili gayud namo ihikaw kaninyo.

Hilabi na ngadto sa buot gyud makat-on ug ganahan pod mo hatag sa ilang serbisyo sa ilang tagsatagsa ka mga barangay. Alang sa kasayoran sa tanan, inyo untang pahimuslan ang among mga seminars kabahin sa fire safety and prevention nga among ipahigayon matag karon ug unya. Pwede usab kamo nga magpa-schedule sa inyong lugar aron mabisita namo kamo.

 Angayan nga atong timan-an ang fire prevention dili lamang obligasyon sa atong kabomberohan. Nagkinahanglan kini og pagpakabana ug positibong suporta sa publiko. Busa akong hangyo kaninyo nga ayaw ninyo usiki ang kahigayonan nga makabaton kamo og kahibalo sa fire safety ug prevention nga libre ra namong ipaambit kaninyo.

Manghinaut ako nga inyong suroyon ang mga istasyon sa kabomberohan nga anaa sa inyong dapit ug sa walay paglangay magpa-schedule dayon kamo sa akong nahisgotan nga seminar aron mapun-an   sab ang inyong nakamaho-an. Magpaabot lang kami! Sa pikas bahin, wala lang nato damha nga misulod naman diay kita sa atong gitawag nga Ber month. Ug dili naman siguro kana bag-o, nga kitang mga Pinoy ang labing sayo nga magsaulog sa Pasko ug mao pod ang labing ulahi nga motiklop niini.

Kay mangandam naman lagi kita sa pagsaulog sa labing kinaham kaayo nato nga selebrasyon, hinaut nga igong pag-amping unta ang atong buhaton aron malayo kita sa peligro o ba kaha sunog gumikan sa atong gipanggamit nga mga series lights ug uban pa nga dayandayan.

Hisgotan nato kini in full details sa sunod pohon. Sa kataposan, akong mga pag-ampo ug pagsuporta akong ipaabot sa akong mga brod and sis sa Societas Reus Legis nga mikuha sa labing lisod nga pasulit aron mahimong abogado. Ugma na ang ikaduhang Domingo sa 2010 Bar Exams. Good luck and God Bless sa Reus Legis "Magnificent 7"!