Adbiyento na usab

Karong Domingoha pormal na usab nga sugdan sa atong simbahan ang laing hugna sa tuig liturhiko sanglit karong adlawa ang Unang Domingo sa Adbiyento. Ning maong kasaulogan kita gidapit sa pagpamalandong sa mahinungdanong hitabo sa kasaysayan sa atong kaluwasan. Una, ang mahinungdanong pag-abot sa atong Ginoo diha sa iyang Pagpakatawo. Ikaduha diha sa iya unyang ikaduhang pag-anhi diin kita pagahukman segun sa atong mga binuhatan. Mas nindot ug haom nga atong pangandaman kining hitaboa diha sa paglimpiyo sa tagsa-tagsa nato ka mga kasingkasing ug hunahuna.