Daghang mga nagpakabana sa estado sa atong nasud ang nagbantay ug nag-aninaw kun kinsa kadtong mga kandidato nga mobarog aron paglaban sa Reproductive Health Bill. Alang kanila, angayan kining maong mga kandidato nga adunay kaisog nga dili magpagawong sa pipila ka mga sektor aron mapatuman na ang balaodnong maghatag sa katawhan sa igong kasayuran ug kahigayonan nga mohimo sa desisyon isip responsableng ginikanan, alang sa kaayohan sa atong mga kabataan, kinsa klaro na kaayong daghan kanila ang gigutom, gipahimuslan ug gipasagdan.
Konsensya. Mao kini ang gibasehan sa usa ka kandidato nga bag-o lang miari sa Sugbo, sa iyang paglaban sa maong balaodnon. Kay matud pa niya, nakita niya sa iyang kaugalingong mata kadtong pamilya nga adunay 16 ka anak nga wala na makahatag sa panginahanglan ug tawhanong katungod sa ilang mga anak, tungod lang kay wala sila mahatagi sa kahigayonan aron masayud kun unsay mahimo nilang buhaton aron mahatagan sa igong atensyon ug pagmahal ang ilang mga anak, aron mabuhi nga adunay dignidad ug dili sama sa mga hayop.
Karon, mangutana pa ba kita nganong mas daghang pobre kaysa dato sa atong nasud? No brainer, sa iningles pa. Klaro kaayo nga ang tubag mao nga ang mga kabos mas modaghan ug mosanay tungod kay kadaghanan kanila wala intawoy kahigayonan nga masayod kun unsay ilang buhaton aron mahimong mas responsableng mga ginikanan. Sumala sa inyong makita sa inyong kaugalingong mga mata, kana kun dili kita magpaka-buta-bungol, asa man tang lugara makakita og daghang batang pinasagdan, dili ba sa mga lugar o nasud diin ang goberno wala magpatuman og balaod aron ang mga ginikanan mahatagan og igong giya aron mamahimong responsable? Ug mangutana pa ba kita kun nganong mas daghan ang kriminalidad sa mga kabos nga lugar? Tungod kay daghan kanila ang kulang sa giya ug tukmang atensyon sa atong mga ginikanan ug kagamhanan.
Kining isyu sa Reproductive Health Bill timbangonon kaayo alang sa mga kandidato, tungod ang pagpabor o pagkontra sa maong balaodnon sigurado man gyud nga adunay epekto sa iyang kandidatura, Busa, kun taphaw lamang ang baroganan pabor o kontra sa maong isyu, delikado nga maglisud ang usa ka kandidato sa iyang pagkabutang.
Kun konsensya ang katarungan niadtong miingon nga mobarog sila aron mapatunhay ang Reproductive Health Bill, unsa man sab ang katarungan niadtong mamugos nga hikawan ang mga ginikanan sa ilang katungod aron paghimo sa desisyon? Gibati ba kaha nila kun unsay gibati sa matag usa ka bata nga naglaroy-laroy sa kadalanan, natulog sa bugnaw nga semento inig ka gabii, o nangoykoy sa basurahan aron makakaon? Tinuod, ila na lamang ipahiyom ang ilang kahimtang, apan sa sulod sa kasingkasing sa matag usa kanila mao ang mga nadugmok nga espirito ug damgo, tungod sa mga butang ug desisyon nga wala silay labot, tungod sa mga desisyon o aksyon nga wala buhata sa ilang mga ginikanan, sa goberno, ug sa sosyedad.
Karon nga kining isyu sa Reproductive Health Bill nahimo nang isyu sa kampanya, atong mapaabot nga iya-iyang argumento pabor ug kontra sa maong isyu ang manggawas. Makita usab nato ang mga pagtuis sa isyu, melodrama, panghudlat ug uban pang pagmanipular nga gamiton sa pikas-pikas, sama sa naandang paagi sa pamolitika.
* * *
Alang sa inyong mga panahom, palihug email sa hinuktoki@gmail.com. Daghang salamat.