Nganong supak man mo?

Naglibog ko kun nganong gidili man dinhi sa atong nasud ang pag-operate og incinerator nga mosunog unta sa mga basura.

Matud sa miangkon nga mga environmentalists nga ang pag-operate og incinerator makadaut sa panglawas sa katawhan, apan sa Singapore, Taiwan ug ubang nasud, wala pa lagi.

Tingali ang isyu mao kun giunsa pag-operate ang maong incinerator dili kay supakon na lang g’yod ang maong operation sa planta.

Usa ko sa grupo sa mga media gikan dinhi sa Sugbo nga mibisita sa Taiwan pipila ka buwan ang nakalabay. Ang incinerator sa Taiwan apil sa mga dapit nga among giadto.

Didto pa gani kami mangaon sa “restaurant” nga nahimutang sa ibabaw sa panghaw sa incinerator ug nagdung-aw kami sa ubos sa planta diin wala g’yoy bisan gamay’ng baho, walay aso ug bisan unsa.

Ang mga sagbot ug mga kahoy nga anaa palibot sa incinerator pwerteng lapyoa sa dahon nga nagpasabot nga wala g’yoy kemikal nga makadaut.

Ang sapa nga tupad sa incinerator mahimo gani nga kaligoan kay limpyo, dili sama sa atong mga sapa dinhi sa dakbayan nga pwerteng hugawa.

Husto si Vice Mayor Mike Rama nga nangutana kun ngano nga sa ubang kanasuran wala man idili ang operasyon sa incinerator.

Ang incinerator sa laktud, dili makadaut sa atong panglawas, kun ayohon lang ang pagdumala.

Sama god sa mga planta sa elektrisidad nga dinhi sa ato supakon dayon kay kuno makadaut. Makakita gani sila og aso nga gibuga sa panghaw sa planta, kuyawan dayon.

Apan kami nga mga sakop sa media nga nakaadto sa Taiwan, ug uban pang mga planta sa elektrisidad dinhi sa nasud, nasayod na kun unsa’y tinuod.

Kadto god nga wala mahibalo mahadlok man g’yod kay nagtoo nga kanang puti nga aso nga makita nga mogawas sa panghaw, makadaut na sa atong panglawas.

Kana hinoong itum o may pagka lagumon nga aso, aw kana tingali ang makadaut. Pag-adto namo sa Pampanga, misaka g’yod mi sa dapit sa panghaw sa usa ka planta sa elektrisidad, ug dihay higayon nga ang puti nga daw aso, napunta kanamo.

Bugnaw kaayo ang maong daw aso ug amo rang nahanggap nga walay nahitabo. Ang tinuod, usa na kini ka “steam” kay ang aso nga may sagol “abu” gisala na sa tubig sa ilawom sa panghaw.

Akong balikon, kay nahisgutan man god ning bag-o ang isyu sa incinerator, nga ang pamaagi sa pagbutang sa maong planta ang ayohon apan dili ang kinatibuk-ang operasyon.

* * *

Nagbalik-balik g’yod ko sa ospital ning milabay’ng mga adlaw mao nga wala kaayo ko’y serbisyo. Wala na ko makasuwat sa mantalaan ug wala na ko maka-report sa radyo nga akong gitrabahoan.

Karon, balik ko sa pagkontrolar sa pagkaon. Limit ang “rice” ug pinili ang sud-an. Beer likayan kun mahimo, apan kun maapikihan, suklan. He! He!

Bitaw, human sa daghan kaayong mga laboratory examination nga gihimo, gitambagan na ko sa akong mga doktor nga mag-diet.

Ako pa gani nga giingnan nga moapil pa unta ko sa “Beer Drinking Contest” sa Press Freedom Week. Ingon hinoon ang doktor nga pwede ra basta usa ka botelya.

Bitaw, tambag nako sa mga kauban ko sa media, kalma-kalma ta sa pagkaon og mga litson, inom ug daghang beer ug uban pa nga mga matang sa pagkaon.