16. Depende sa anad

Usahay makaingon ko nga depende ra sa anad ang atong pagpili sa tubig ilimnon. Kini tungod kay akong nasaksihan nga may mga tawo nga conscious kaayo bahin sa tubig nga ilang imnon (purified gyod) apan nasakit lang gihapon, may mga tawo man usab nga bisan balasubas bahin sa tubig nga gisulod nila sa ilang lawas, baskog man hinuon kaayo og wa man makasinatig sakit diin nalambigit ang tubig (drinking water).

Sa among pamilya, naanad mi pag-inom og tubig nga pinabukalan. Gihimo kini namo sukad niadtong 1980s kanus-a mihugpa sa among dapit ang epidemya nga nakapalisang namo. Daghan ang nangamatay sa among lugar tungod kay naigo sa suka-kalibang, eltor, diyareya ug LBM. Maong misanong mi sa awhag sa DOH nga pabukalon ang tubig nga among imnon (wala pa mauso niadtong panahona ang bottled water).

Sukad niadto, magdaot na ang tiyan sa akong mga ginikanan kun makainom sila’g tubig nga dili pinabukalan. Salamat nga wala ko madala sa maong kahig ug makainom gihapon kog tubig nga dili pinabukalan nga walay mud-on sa lawas. Purhisyo man god kini kun maadto kag laing balay. Hasol kay dili ka man makainom sa ilang tubig kay madaot ka man.

Maong wala ko anda ang akong kaugalingon pag-inom kanunay og tubig nga pinabukalan o purified. Gituyo ko kini kay laagan ra ba ko kaayo. Aron kun makaadto kog dapit diin dili available ang bottled water o walay refilling station sa tubig, makainom ko og bisan unsang tubig nga walay paabotong kakulian sa lawas.

Hinuon, mas maayo gyod nga tinuon nga limpiyo ang tubig nga atong imnon aron pagseguro nga maka-serve kini sa iyang purpose nga mao ang pagpalambo sa kahimsog sa atong lawas. (Sunod: Alkaline Ionized Water)