Baratong kinabuhi

Kaniadtong miaging semana tulo ka mga batang patay ang girespondihan sa kapulisan. Sa tulo ka mga batang patay nga gipanglabay usa niini ang sa dakbayan sa Sugbo ug duha ang didto sa Lapu-lapu. Ang mga patay’ng batang gipanglabay gitoohan nga pulos gipakuha sa ilang mga inahan o ba kaha amahan.

Pagkasalbahis sa inahan ug amahan nga mihukom sa pagpalaglag sa kinabuhi nga diha sa sabakan. Wa man lamang kini hatagi og kahigayonan nga makakita og kahayag sa kalibutan.

Seguro ang maong mga bata sa dihang buhi pa kini sa sabakan sa ilang mga inahan dako kini og plano sa ilang kinabuhi ug nanaad nga panggaon, mahalon ug lipayon ang ilang mga inahan, amahan ug mga apohan kun makagawas na kini sa sabakan. Apan namatay ang ilang tingoha tungod gipatay man sila sa ilang way mga puangod nga mga ginikanan.

Kining maong mga kaso nagpalig-on lamang gayod sa pag ubos na pagmaayo sa moralidad. Kun kaniadto dili mabayran ang kinabuhi sa tawo karon puwede na ug barato pa.

Wa nay bili sa uban ang kinabuhi. Tungod lang sa kauwaw patyon ang kaugalingong dugo pinaagi sa pagpakuha. Tungod sa kayugot patyon ang kinabuhi pinaagi sa pagbayad og gamay nga kantidad niadtong mga gun for hire.

Kun kaniadto dili mabaligya ug dili mabayran ang tawo, karon puwede na ug barato pa. Didto sa kaulohan usa ka bata ang gibaligya sa iyang inahan sa kantidad nga tulo kalibo. Samtang sa dakbayan sa Mandaue gitunolan lamang og duha ka libo ka pesos ang mga ginikanan sa batan-on nga namatay kay nahagbong sa kanal. Barato na gyod kaayo ang kinabuhi ning bag-ong panahon. Ngano kaha?

Sa pag-uswag sa bag-ong panahon minunot usab ang pagbarato sa kinabuhi sa tawo.