Makalagot nga text messages sa Globe

Kinsa kaninyo ang kanunay’ng mabiktima sa binuang niining mga telecommunications company nga kanunay’ng magpadala kaninyo og mga walay hinungdan ug makalagot nga mga messages?

Sugod niadtong miaging adlaw, gihasi ko niining mga text messages gikan sa Globe Telecom nga wala gyuy hinungdan.  Makaingon ko nga pagpalagot kanako nga usa ka prepaid subscriber ang gihimo sa Globe Telecom tungod kay sunod-sunod ang pagpadala nila og susama nga walay hinungdan nga messages.

Niadtong Lunes, makaduha ko nakadawat og sunodsunod nga upat ka sunodsunod nga messages nga magtudlo kanato unsaon pagpasa og load, unsaon pag-aplay og unlimited text ug uban pa. Wala pa ko maglagot kay abi nako og mao ra kadto.

Naunsa ba hinuon nga kagahapon, makalima ko gipadad-an og susamang message nga moginta lang og pipila ka minutos ug oras ang pagpadala sa una ngadto sa ika-upat nga sunodsunod nga text messages.

Kinsa nga subscriber ang dili saputon niining upat ka pusot-pusot nga messages:

1/4 To send LOAD, txt<amount><PIN> if regstrd or switchd ON> & send to 2+10digit mobile num.Ex:15 1234 send to 29XXXXXXXXX.

To send UNLITXT to a Globe Prepaid #,

2/4 text <UNLITXT keyword> <PIN if regstrd or switchd ON> to 2+10digit mobile num. Ex: UNLITXTD15 1234 send to 29XXXXXXXXX. To send TM Todo Text to a TM number,

3/4 text TM<amount> <PIN if regstrd or switchd ON> to 2+10digit mobile number. Ex: TM10 1234 send to 29XXXXXXXXX. P1/txt.

4/4 For a list of valid keywords, text HELP LIST to 2916. P1.00/text.

Kamo kunoy imagine kanang upat ka pusot-pusot nga message unya ipadala sa imong cellphone maka-pito ka higayon sa usa ka adlaw lamang?

Unang set sa maong messages nadawat nako buntag sayo. Wala nako matiman-i ang oras kay nagtuo ko nga mao ra kadto ug ako lang gi-delete.

Apan sa pagka-alas 11:52 sa buntag, makatulo gipadala sa akong number ang maong upat ka pusot-pusot nga messsages. Laing set sa maong messages nadawat na usab nako alas 12:35 sa hapon. Laing set sa pagka-alas 3:36 sa hapon, ug samtang nagsulat ko niining Tikdol batok sa Globe mga alas 4:20 sa hapon, nakadawat na usab og susamang set sa mga messages.

Kita intawon ang mabuang og delete!

Nagsalig lang gyud kining mga higanteng telecom sama sa Globe nga malisud madokdok sa gobyerno kun may mga reklamong maabot, sama sa akong kaso.

Apan alang kanako, hago na kaayo ang pagreklamo ngadto sa hingtungdang ahensiya sa gobyerno. Nasayod kita nga wala ra gihapoy mahitabo sa atong reklamo tungod sa pagkagamhanan niining mga telecom companies.

Kay kun wala pay daghan nakong mga contact nga nasayod sa akong number, mobalhin og Smart o ba kaha Sun Cellular nga mao na karon ang kusog aron biyaan na ang Globe nga dugay na nako nga gihangop tungod sa mga higala nako sa maong telecom nga mga maayong tawo.

Maayo lamang alang nako kay adunay mga kaila sa Globe mismo. Kadto intawong mga yanong subscriber nga giabot na usab og kalagot sa kabuang sa Globe, unsa man lang ilang mabuhat gawas sa pagyawyaw, ug ang labing bati nga mahitabo ang pagbalhin ngadto sa laing service provider, Smart o Sun Cellular.

* * *

COMPUTER. Napanglantawan nako ang pangandoy sa kagamhanan sa dakbayan sa Lapulapu nganong gihangop nila ang pagpalambo karon sa information technology sa maong siyudad.

Aduna koy nadunggan nga ang giplano nga reclamation project sa isla sa Mactan gitumong aron pagbutang og usa ka IT valley nga mahisama sa Silicon Valley.

Usa kini ka dakong damgo alang sa mga taga-Lapulapu kun tinuod man ang pagbutang nila og IT valley sa ila unyang multi-million reclamation project. Apan alang kanako, dili kini imposible.

Busa, karon lang daan angayan nang mangandam ang mga opisyal sa Lapulapu alang sa maong dakong hagit. Kun hangpon nila ang maong dakong damgo paghimong IT city sa Lapulapu, angay nilang sugdan ang paghimong fully computerize sa tanan nilang buhatan aron dili sila mahimong kataw-anan sa higayon nga maabot na ang maong adlaw sa pagpabarug sa maong proyekto.

Laing hagit nila mao ang paghimong “infotech savvy” sa mga kabatan-onang taga Lapulapu aron maandam sa higayon nga mapabarug ang maong IT valley. Kay kun dili nila andamon ang mga batan-on karon, kinsa man unya ang modumala sa mga kompaniya sa computer sa ila unyang IT valley?

Nagtuo ko nga kadtong daghang computer sets nga gipamalit sa kagamhanan sa dakbayan sa Lapulapu nga maoy nakaingon nga na-Ombudsman si Mayor Arturo Radaza usa kadto sa pagsugodsugod og computerize sa tanang buhatan nga ubos sa city hall, apil na ang kabaranggayan.

Sa confidential report sa kalihim sa mayor, ang procurement officer nagkanayon nga apil diay sa maong mga computer sets ang bangko, lamesa, automatic voltage regulator, uninterrupted power supply nga adunay withholding ug lima ka tuig nga warranty.

Kun akoy mayor sa Lapulapu, dili ko magpatarog sa mga pagsaway ug pasagdan na lamang kanang mga kritiko. Kay kun adto ka maminaw sa mga kritiko, walay mahitabo sa maong siyudad ug kanang damgo nga IT valley nga makahatag og libuan ka trabaho dili lamang sa mga taga Lapulapu, kun dili apil na ang mga taga silingang dakbayan ug lungsod nga mabulahan niini.