Sa makausa pa, gibalik ang diskusyon mahitungod sa pagpahamtang sa silot kamatayon alang niadtong mga criminal nga napamatud-ang sad-an sa mga linuog nga krimen. Si Senador Migz Zubiri nga maoy mipukaw sa maong isyu igo lang sab dayon nga nahilom human makasugat sa daghang pagbabag sa iyang sugyot nga ibalik kini.
Kining maong sugyot nag gumikan sa mga panghitabo karong bag-o diin gipamatay ang mga empleyado sa mga nanulis sa usa ka bangko didto sa Luzon, ug gipun-an pa gyud niadtong usa ka huramentado nga mirakrak sa mga panimalay sa mga kauban niyang trabahante, diin kasagaran intawon sa mga nakalas mao ang mga bata.
Giwagtang nato ang silot kamatayon niadtong umadtohay si Presidente Arroyo sa Europa aron pagduaw sa Santo Papa. Bisan kun kita membro sa kahugpungan sa mga nasud, nga mideklarar batok sa pagpahamtang sa silot kamatayon, pinaagi sa Universal Declaration of Human Rights, ug gipalig-onan sa International Covenant on Civil and Political Rights, sa mga dugang protocol niini, ug sa Convention Against Torture and Other Cruel, Inhuman or Degrading Treatment of Punishment, taud taud gyud nga nagpabilin ang Death Penalty Law kon Heinous Crimes Law (RA 7659) nga nagpahamtang sa maong silot dinhi sa Pilipinas, gani, diha gyuy pipila nga gipaubos sa maong silot. Kini tungod kay ang ato mismong Konstitusyon wala gyud total nga nagdili sa pagpahamtang sa silot kamatayon.
Niadtong miaging adlaw, daghang nahasagmuyo ug naguol sa gibalitang linuog nga paghunos sa kinabuhi sa usa sa mga banggiitang abogado sa Sugbu nga mao si Atty. Richard “Dick” Sison. Gawas sa pagpanglaban, naila usab si Atty. Sison sa pagserbisyo sa komunidad labi na dinhi sa Dakbayan sa Sugbu, isip usa sa mga haligi sa ERUF kon Emergency Rescue Unit nga gimugna ni Hermie Cortes, igsoon sa Mayor sa Mandaue nga si Jonas Cortes. Usa usab siya ka opisyal sa Army Reserve Command dinhi sa Bisayas.
Kining maong insidente usa sa mga katay-katay nga pagpamusil nga nahitabo niining pipila ka semana nga milabay. Ang nakalahi niining kang Atty. Sison, ug niadtong pulis nga nag-drive og taksi nga gipatay human tulisa, kay kasagaran sa ubang mga dagkong balita sa pagpatay karong bag-o naglambigit man og mga tawong adunay mga kaso, diin adunay pagduda sa partisipasyon sa mga giingong vigilantes.
Daghang nagtoo nga maayo ra sab nga gi-vigilantes kadtong mga badlongon sa katilingban. Gani adunay mga opisyal ug sakop sa media nga walay lipud lipud nga mohatag og pabor nga komentaryo o moabiba bahin niini. Daghan usab nga nagtoo nga kadtong mihunos sa kinabuhi sa nahisgotang abogado ug pulis angay nga pamatyon usab tungod sa pagka-linuog sa maong mga krimen.
Makapangutana kita nga, naunsa na man kining atong nasud? Mibalik na ba kita sa barbaric nga panahon, diin adunay kultura sa patay aron pagtabla sa atraso? Ngano man intawong gipasipad-an man ang maong abogado kun ugaling aduna may tiil nga natumban niini? Ug nganong kinahanglan man gyud nga hiposon ang kriminal sa maong paagi? Ania ba kita sa panggubatan? Hain na man ang giingong Rule of Law? Kun ang gobiyerno, mga opisyales ug mga giidolo sa atong katawhan maoy mismong mosilsil sa alimpatakan sa mga tawo nga ang pagpatay mao ang tubag sa kriminalidad, natural lang tingali nga sa madugay ug sa madali, mahimo na natong kultura ang pagpatay, ug mao unya kini ang kultura nga kadak-an sa mga sumusunod nga henerasyon.
Kining maong posibilidad angay untang hinuktokan natong tanan tungod kay kitang tanan, dili lamang kadtong anaa sa gobiyerno, adunay kalabot sa pagpatunhay sa hustisya sa atong nasud. Ug ania sa atong mga kamot ang tahas sa pag-ugmad sa usa ka malinawong Sugbu alang sa atong mga anak.
Alang sa inyong mga panahom, palihug email sa www.hinuktoki@gmail.com.