EDITORYAL - Tulis, patay, nagkagrabe

Nagpadayon ang pagpanghagit ngadto sa kapolisan niining mga batan-ong gangster ug mga drug addict nga nagsamok-samok sa atong katilingban.

Lain nasang miyembro sa atong komunidad ang gitulis ug gipusil patay sa mga mamumuno nga gituohang sakop sa usa ka gang sa mga batan-ong kawatan ug killer.

Ang ilang gibiktima mao ang usa ka buotang nursing student nga gitakda nang mogradwar unta ning buwana. Daghan ang gianognan sa nakalas nga kinabuhi sa maong dalagang estudyante.

Nakapaukay kini sa atong komunidad ug gani duha ka civic clubbers ang misinggit:

“Grabe na ning krimen nga nanghitabo sa atong dakbayan! Nagkagrabe ang tulis ug patay!”

“Kinahanglang aksyonan kini dayon sa kapolisan,” matud nila. “Dili mahimong saad-saaran lang ta nga sulbaron ang krimen pero anha ra kutob sa saad,” matud ning duha ka sakop sa respetadong civic club dinhi sa Sugbu sa ilang pagbisita sa publisher ning mantalaan.